MPCC, PC leh ZNP-in thuthlung an ziak

Mizoram Pradesh Congress Committee, Peoples’ Conference Party leh Zoram Nationalist Party-te chuan Mizoramah sakhaw zalenna a awm theih nan leh Mizoram leh a chhunga mipui an him theih nan thawkho turin thuthlung an ziak.

Pawl pathumte hian nimin khan Vanapa Hall-ah 'Sakhaw zalenna leh ram leilung fate hamṭhatna humhalh' tih hmangin inkhawm an buatsaih a; Mizoram Secular Alliance tih hming thawhhona tur thuthlung an ziak nghal a, MPCC president Lalsawta, PC president Vanlalruata leh ZNP president H Lalrinmawia ten hming an ziak a ni.

Inkhawm hi MPCC treasurer Dr Lalmalsawma Nghaka'n a kaihruai a; pawl pathum president-te'n thu an sawi. Lalsawta chuan, "Mizorama secular alliance kan thawhho hi kan hnam damna a ni. India ramah Hindu lal ram buatsaih tumtu BJP leh a thawhpuite hi Kristian anga kan dodal a ngai a, political party, kohhran leh NGO ang pawha kan do a ngai a ni," a ti.

Lalsawta chuan, India ram leh Mizoramah sakhaw zalenna a awm a ngai tih sawiin, Kristian missionary-te'n thlamuang taka rawng an bàwl theih nan thawhhona an siam tih a sawi a; Mizoram Secular Alliance-ah tel ve turin kohhran leh NGO-te bakah, MNF leh ZPM pary-te a sáwm.

PC president Vanlalruata chuan, BJP-in Hindutva kalpui a tum mekah Uniform Civil Code chu an duh lo a, an do tlat dawn tih sawiin, "Mizoram hi anti BJP kan nih a ngai. Hei hi kan ram, kan hnam, kan sakhua a himna atan a ṭul," a ti.

Vanlalruata chuan, BJP leh MNF chu sum hmatheha cheah a puh a, ZPM pawh sum hmachhuan tum buaiah a puh bawk a, "Heng zawng zawng lak aṭang hian tâl chhuah theih a ni a, sum dinhmun ṭha lote hi siamṭhat theih a ni," a ti a; mipui hnena chanvo ṭha zawk pek chu sorkar ṭha tih tur a nih thu sawiin, Mizoram Secular Alliance thláwp turin Mizoram mipui a sáwm.

ZNP president H Lalrinmawia chuan, dikna leh rinawmna nena ram hruai a tlo ber tih sawiin, "Kan ram, kan hnam a damna tur chuan kan inlungrual ang a, a ṭul chuan kan thawkho mai tur a ni," a ti a; Manipur thil thleng chu BJP Hindutva nen a inzawm tlat niin a sawi.

H Lalrinmawia chuan, BJP chu tu mahin mawngzawm tawh lo se a duh thu sawiin, "BJP hian Mizote hi min duh lo, kan ram chiah hi a ni an duh," a ti a, Mizoram Secular Alliance-a tel vek turin Kristian zawng zawng a sáwm bawk.

MIZORAM SECULAR ALLIANCE RESOLUTION

India rama BJP leh a thawhpuite'n kum 2014 aṭanga sorkarna an siam hnua Hindu lal ram din tuma hmalakna leh sorkar laipui dan siam hmanga hnam tlem zawk leh tlangmi (tribal)-te nêk ral tuma hmalakna chak taka kal mek hi Mizoram Secular Alliance chuan ngawi renga thlir liam mai mai chi-ah a ngai lo a. Hindu lal ram din tumna hian sakhaw tênau zawkte nêk ral tumna a ken tel tlat avangin Kristian missionary-te’n chanchin ṭha hrilna kawngah harsatna an tâwk mek a, khawvel mithmuhah India ram hi Kristiante tana ram him lo langsar takah a chantir mek bawk. India ram hi sakhaw tênau zuitute leh hnam tlem zawkte tana ram nuam leh him a nih theihna atan BJP leh a thawhpui pawlte chu hnâwl ngam turin MSA chuan Mizoram mipui kan ngen a. Hetihrual hian, BJP sum chakna beisei lotu zawng zawngte chu kan ram, kan hnam leh kan sakhua a dam khawchhuah theih nan MSA-ah lo tel turin kan sáwm nghal bawk.