Serie A: Zaninah an khel ṭan dawn

Italian football inelna sang ber Serie A chu zanin aṭangin khelh ṭan a ni dawn, champion lai Napoli chuan zan dar 10:00-ah Frosinone an lenchilh dawn a, striker ṭha Victor Osimhen hoin an inlan ang.

Season hmasa khan rin loh tak maiin Naples club hian Serie A nomawi an chawi, kum 33 hnuah Italian football inelna sang berah an hlawhtling ve leh chiah a ni, rin loh tak maiin coach Luciano Spalletti chuan a hna a bansan nghal daih.

Serie A champion hi an coach thar Rudi Garcia hoin an inlan dawn, an champion theih nana defender pawimawh Kim Min-jae chu Bayern Munich lamah a kal bawk, coach leh South Korean international hmunruak hi a zau viau mai thei.

Chutihrualin, season hmasa nipui bazarah pawh khan Napoli hian an player ṭha an chan nual a, chutichung chuan kum dang zawng aiin an khel ṭha zual zawk tih a takin kan hmu, kuminah fiahna an hmachhawn leh dawn a ni.

Inter Milan chu an coach ṭha Simone Inzaghi hoin an la khel thei dawn. Season hmasa Champions League final hruai thlengtu coach hian Lautaro Martínez a la chhawr thei dawn a, tawnhriat nei Marko Arnautovic an neih belh bawk.

Carlos Augusto, Marcus Thuram leh Davide Frattesi te an neih belh a, loan hmanga an hawh Romelu Lukaku te hawh nawn rih lo mah se Inter squad hi a chhah ṭha tawk tura ngaih a ni, zaninah Monza an mikhual ang.

Juventus hi mangnghilh chi an ni lo ang. Old Lady hi season hmasa khan point 10 paihsak an ni a, an thleng sang tawk lo. Midfielder rinrawl tur Paul Pogba chu hliam vangin an chhawr mumal lo, kuminah erawh a bul a ṭan thei dawn.

Striker ṭha Dusan Vlahovic chu a dam a, forward Federico Chiesa pawhin pre season a hmang ṭha. Coach Massimiliano Allegri-a'n a remkhawm fuh a nih phawt chuan Serie A nomawi chawi turin an squad a ṭhat tawk a rinawm.