Vanglaini - Sorkar hum nan Karnataka minister-te an bâng

KHAWTHLIR

Zoonosis Day

Nimin khan Mizorama a vawi khat nan Health Services directorate conference hall-ah World Zoonosis Day hman a ni a, Health & Family Welfare Department Board vice chairman ZR Thiamsanga, MLA-in a hmanpui. Dr ZR Thiamsanga chuan, Zoonosis natnate chungchangah theihtawp chhuaha hma la zel turin sorkar a inhuam thu a sawi. World Zoonosis Day hi July 6-ah hman ṭhin a ni a, kuminah holiday a nih avangin nimin khan Integrated Disease Control Programme huaihawtin hman a ni.

Thisen pe

Sateek Branch KṬP chuan nimin khan State Referral Hospital blood bank-ah blood donation camp an huaihawt a, mipa 25 leh hmeichhia pakuate'n thisen unit 34 an pe.

Zirlai chawimawi

Kolasib-a Salvation Army Hostel for the Blind-a chêng, mit lama harsatna nei zirlai, an

zirnaa ti ṭhate chawimawina hun vawiin khan an sikulah buatsaih a ni a, Kolasib bialtu MLA K

Lalrinliana, minister-in a hmanpui. Inkhawmah hian HSLC 2019 leh HSSLC 2019-a distinction leh first division-a pass zirlai panga hnenah chawmawina an hlan. The Salvation Army Home for the Blind hi April 15, 1977-ah hawn a ni a, zirlai khaw hmu lote a thlawnin chaw leh riahna an pe a ni.

MCSA hruaitu

Mizoram Civil Service Association (MCSA) chuan tun hnai khan kum 2019-2021 chhunga an pawl office bearer turte an thlang a; president-ah K Laldingliana, vice president-ah Florence Zotluangpuii, general secretary-ah

H Lalhmingthanga,

assistant general secretary-ah Lalrohlua, treasurer-ah H Lalchhandami, finance secretary-ah H Lalrinpuia te an thlang.

DC-in enfiah

Kolasib DC Zoengsanga chuan nimin khan Kolasib District Hospital a tlawh a, an dinhmun a zir chiang. Kolasib DC chuan, doctor-te hna chu mipui nena inkungkaih tlat a nih avangin mipui thleng phâk rawngbawlna chu inpekna thinlung nena thawh a pawimawh thu a sawi a, "Damlo enkawlna kawngah dawhtheih a ngai a, ṭawngkam nêm hi damlo tana dampui tham

a tling," a ti.

DAWNTISEI

Sorkar hum nan Karnataka minister-te an bâng

Karnataka-a Congress-Janata Dal (Secular) ṭangrual sorkara minister-te chu MLA helte thlem kir a, sorkar hum a nih leh theih nan nimin khan an bang.

Kar kal ta Inrinni khan Congress-JDS MLA 12-te chuan assembly speaker hnenah banna an thehluh a ni. Nimin khan independent MLA, minister ni bawk chu a bang ve leh a, hei vang hian ṭangrual sorkar dinhmun hi a derthawng tawh a ni. Rorellai party-te chuan MLA-ten banna an thehluh chungchangah BJP chu inrawlhah an puh a, ṭangrual sorkar paihthlak tuma phiarruah an puh. Mahse BJP chuan he thilah hian inhnamhnawihna a neih loh thu a sawi thung.

MLA 12-te banna thehluh hi speaker Ramesh Kumar chuan a la ngaihtuah lo a, a pawmsak chuan assembly seat 224 awmnaah seat 118 nei mek, Congress-JDS ṭangrual pawl hian majority a nei pha tawh dawn lo a ni.

House-a majority mark pawh 113 aṭangin 106 a tla thla ang. Hetihlai hian independent MLA, minister aṭanga bang ta Nagesh hian BJP a thlawp dawn avangin BJP hian thlawptu member 106 a nei thei tawh dawn a ni. MLA helte hian banna lehkha an thehluh hnuah Mumbai an pan nghal a, Nagesh pawh hian nimin vek khan Mumbai hi a pan ve nghal a ni.

Ṭangrual sorkara MLA pahnih pawhin ban an tum nia sawi a ni bawk a, pakhat zawk chu Karnataka minister hlui Ramalinga Reddy fanu, Congress member Soumya Reddy a ni. JDS chuan BJP-in an thlem tur lakah vengin nimin khan an MLA zawng zawngte chu Kodagu-a Paddington Resort-ah a awm tir vek bawk.

BJP chuan ṭangrual sorkar a buai tak avangin sorkar thar siam turin an party chu sawm an phut tih an sawilang nghal a, hemi rual hian Congress-JDS sorkar buaina chungchangah inrawlhna an neih loh thu an sawi lang nghal bawk.

Share this Post

Login to comment

No Comments