Blues striker Nkunku a hliam

Chelsea striker thar Christopher Nkunku chu Borussia Dortmund nen 1-1 a an inhnehtawk ṭumin a khup a hliam a, thlak a ngai hial. Blues coach Mauricio Pochettino chuan a player hi na tak a nih loh a beisei thu a sawi.

Kum 25 mi Nkunku hian nipui bazarah Chelsea hi pound maktaduai 52-in a zawm a, season hmasa RB Leipzig tan match 38 aṭanga goal 23 khung thei a nih avangin a lakah beisei pawh an nei sang.

Mahse, tunah chuan season thar tirah a inlan thei ngei dawn em tih a chiang ta rih lo. Poch-a chuan, "Doctor ten an endik ang a, chumi hnuah a dinhmun tur tak kan hrechiang thei chauh dawn.

"Nkunku khan a khel chhe lo, goal khung theihna remchang pawh a nei. Mahse, a khup na vangin a tihlawhtling thei lo tih a lang, hliam na tak a nih loh hram chu ka beisei," tiin a sawi.

Chelsea hian season thar hma chuan match khelh tur an nei tawh lo. Nimin zinga Dortmund nen Soldier Field, Chicago-a an inkhelh kha an match hnuhnung a ni tawh - London khawpui lamah training an nei chhunzawm ang.

August 13, Pathianni zan hian Stamford Bridge-ah Liverpool an mikhual dawn, coach thar Pochettino hoa Premier League an khelh hmasak ber tur hi thil awlsam a ni dawn lo, chuvangin an striker Nkunku hi inlan thei ngei se an duh ang tih a chiang.