Ruah sur nasain hmar lamah harsatna thlen belh

Ruah sur nasa avangin India hmar lamte'n harsatna an la tawh belh zel a, Army leh National Disaster Response Force (NDRF) te chuan state ṭhenkhatah ṭanpui leh chhanchhuah hna an thawk mek a ni.

India hmar lama luite chu a len nasat avangin khaw chhungte pawh tuiin a chim nasa hlawm hle a ni. Weather office thuchhuah chuan Himachal Pradesh, Jammu and Kashmir, Uttarakhand, Haryana, Delhi, Uttar Pradesh leh Rajasthan-ah nasa zawkin ruah a la sur dawn niin a tarlang.

Uttarakhand chief minister Pushkar Singh Dhami chuan Thawhlehni khan Indian Meteorological Department thuchhuah bawhzuiin chhiatna leh harsatna thleng thei atana an inrin reng thu a sawi a, an state chhungah orange alert an puan thu a sawi bawk. CM Dhami chuan,"Kum tinin fur lai chuan khuarel chhiatna kan tawk ṭhin a, lui tui lian emaw, ruah tui tam avanga leimin a thleng a, kan inring lawk a ni. District tina thuneitute leh disaster management-te pawhin an hna an thawk vek a, thil eng pawh thleng thei atana inbuatsaih turin kan inhriattir tawh. Army, NDRF leh PWD department te pawh harsatna lo thlen huna che chhuak mai thei turin an inpeih vek tawh a, mipuite pawh ṭanpui an ngaih dan ang zela pui thei turin kan ngaihven a ni tih kan hriattir reng bawk," tiin a sawi.

Himachal Pradesh-ah chuan ruah sur hian harsatna a thlen nasa zual a, nimin thleng khan mi 30 an thi tawh. Chandertal, Pagal Nallah bakah, Lahaul leh Spiti hmun ṭhenkhatah chuan leiminin kawng a hnawh avangin khualzin 500 chuang an tangkhang mek bawk. NDRF official-te tarlan danin Una district-a tui lianin a dan, kuthnathawk mi 515 an chhanchhuak tawh bawk a ni. Himachal Pradesh-a ruah surin a thil tihchhiat hi Rs. vbc 3,000 hu a tling tawh.

New Delhi-ah chuan Yamuna lui tui chuan a him chin pel khawpa a chim san tawh avangin Yamuna lui chunga kal rel kawng hlui khar rih a ni. Northern railway chuan nimin zing dar 6 aṭang khan Yamuna lei hlui zawkah hian rel tlan phal a ni rih lo tih a puang. Thuneitute chuan tuilian thlen theihna, hmun hniam laia deuha khawsa mihringte chu an sawn chhuah mek thu an sawi a, khawpui hmun hrang hranga relief camp an siam leh vantlang hmun thenkhatah an dah rih dawn a ni.