London-a Indian High Commission kawtah Khalistan-te'n kawng zawh dawn?

San Francisco, US-a Indian consulate hal a nih hnuah Sikh ram hran din tumna, Khalistan movement thlawptute chuan London-a Indian High Commission kawtah kawng zawh an tum nia hriat a ni.

Tun hnaia social media platform hrang hranga a lan danin, Khalistan-te hian 'Kill India' tih thupuia hmangin poster an theh darh a, poster-ah hian July 8-a kawng zawh turin an inko khawm. Poster-ah hian "Khalistan 'KILL INDIA' rallies 8th july to challenge Indian hand in assassination of Nijjar" tih inziakin, Khalistan thlawptu account leh journalist eng emaw zat an tarlang tel a ni.

United Kingdom Foreign Secretary James Cleverly chuan, London-a Indian High Commission vau a ni chu an ngai thu tak hle a, Indian high commissioner Vikram Doraiswami leh India sorkar hnenah pawh High Commission-a thawkte leh chengte himna an ngaihpawimawh tur thu an hrilh tih a tarlang.

External Affairs Minister, S. Jaishankar pawhin Khalistan-te'n poster an siam atanga India palai vau tawkte dinhmun an ngaihven thu leh hemi chungchang hi an buaipui tur thu a sawi a. Canada-a Tradeau sorkar bakah hetiang thil thlen fona thin hmuna an hruaitute pawh kan kawm bawk ang tiin a sawi.

Hardeep Singh Nijjar hi Khalistan movement hotu pakhat a ni a, Canada-ah mi tu tih hriat lohte'n an kap hlum a ni. Mahse Khalistan thlawptute chuan hei hi India thiltihah ngaiin ram danga India palaite leh an chenna beih hi an tum ta a ni.