Sorkar laipuiin UCC hi BJP sorkar lohna state beih nan a hmang - MK Stalin

Tamil Nadu Chief Minister MK Stalin chuan Ningani khan thu thar lakhawmtute a kawmnaah, central-a sorkar, BJP chuan Uniform Civil Code (UCC) chu hmanruaah hmangin BJP sorkar lohna state-te beih nana hman an tum thu leh, UCC duh loh thu sawi apiangte chu central agency - CBI, ED leh IT te hmangin an chennaah kal chilha an dap ṭhin tih a sawi.

Prime Minister Narendra Modi-a'n UCC hi hman vat a ṭul thu a sawi hnuah, ram chhung hmun hrang hrangah UCC chungchang hian buaipui a hlawh zui nghal hle a ni. Thawhṭanni atanga Parliamentary Standing committee for Law and Justice ṭhu khawm pawhin UCC kaihhnawiha dan leh hraite an sawiho dawn a ni.

Uttar Pradesh Chief Minister hlui, Mayawati pawhin,"Kan party (BSP) chuan UCC hman hi kan dodal hran lo, mahse, BJP kalpui tum dan hi chu kan duh lo. UCC hi politics hmanruaa hman chi a ni lo, ram puma tihluihnaa hman chi pawh a ni lo,"tiin a lo sawi tawh.

Hetih lai hian union minister of commerce and industry, Piyush Goyal chuan UCC chu hman vat ngai thil, ram pum mipui zawng zawngte tel leh ṭanho ngaihna thil a ni tiin, tuna la thlawp lem lote thlawpna pawh BJP hmalaknain an hmuh thuai theih a beisei thu a sawi. "Rajya Sabha-ah majority kan nei a, party dang hruaitu eng emaw zat he ram inpumkhatna duhtu an awm bawk. BJP hian party dangte thlawpna kan dawn ngei pawh ka ring," tiin a sawi.