Amarnath Yatra titawp lailawk

Hindu sakhaw zuitute'n kum khata vawi khat an neih ṭhin, July 1-a ṭan, Amarnath Yatra chu khaw that loh avangin tihtawp lailawk a ni. Amarnath Yatra hi August 30 thleng neih tura ruahman a ni a, mahse, Kashmir hmun hrang hrangah ruah a sur nasat avangin Yatra hmanga kawnga thang mekte pawh kal chhunzawmtir phal an ni rih lo.

"Zingkar aṭangin ruah nasa tak a sur a, Yatra hmanga puk thianghlim tlawh tura kalte pawh Baltal leh Nunwan base camp-ah an chawl vek rih a ni. Tute mah kal chhunzawm phal a ni lo," tiin, Senior Superintendent of Police, Mohit Sharma chuan, Chanderkote district-ah an lo dan vek thu nimin khan a sawi.

Jammu-a official-te chuan Pahalgam base camp pana kal mek, mi 4,600 te chu Chanderkot-ah an lo dan thu an sawi a, Baltal camp pana kal mek, mi 2,410 te erawh an kal chhunzawm phalsak an ni tiin an sawi. Khua a ṭhat chhoh leh hunah yatra chu chhunzawm a ni ang, an ti.

Hmun thianghlim tlawhtu mi 17,202 te chuan July 6, Ningani khan Kashmir chhim lam tlanga Lord Shiva shrine an thleng tawh. Kumina Yatra hmang, puk thianghlim thleng tawh hi mi 84,768 an tling tawh.

Hindu hmun pawimawh, Lord Shiva shrine hi Anantnang district, Jammu & Kashmir Himalaya tlang chhim lama puk awm niin, tuipui aṭanga metre 3,880 zeta sanga awm a ni. Kumina neih mek Amarnath Yatra hi ni 62 awh tura ruahman niin, July 1 khan Anantnag district aṭanga Pahalgam leh Ganderbal district-a Baltal atangtein hmun thianghlim tlawh turte hi an kal tan a ni.