Parliament building thar prime minister Narendra Modi-a hawn tir tum duh loh vanga eptu party 20-ten Pathiannia building thar hawnna boycott an tum thu an sawi laiin, party dang pahnih Biju Janata Dal (BJD) leh YSRCP chuan building hawnna inkhawmah an tel tur thu an sawi. 
BJD thupuangtu, Lenin Mohanty chuan hawnna inkhawmah an party MP-te an tel tur thu a sawi a, Parliament chu democracy symbol a ni a, politics nena inkaihhnawih tir tur a ni lo tiin, Parliament zahawmna leh nihna chu vawnhim zel a ngai a ni, a ti. BJP hian Lok Sabha-ah MP 12 leh Rajya Sabha-ah MP pariat a nei a ni. 
Kar hnih liam ta khan BJD hotu, Odisha chief minister Naveen Patnaik chuan New Delhi-a prime minister Narendra Modi a hmu a, Jagannath International Airport siam chungchang sawipuiin PM hian sorkar laipuiin a theih anga a puih tur thu pawh a lo hrilh a ni. An inkawm zawh hnua chanchinthar lakhawmtute a kawmnaah, Patnaik chuan inthlanpui lo awm turah pawh an party mala an chuh tur thu leh, third front din theih a nih a rin loh thu a sawi zui bawk. 
Andhra Pradesh-a rorellai, Yuvajana Shramika Rythu Congress Party (YSRCP) pawhin building thar hawnnaah hian an tel tur thu an sawi ve bawk. Sorkar laipui chuan kum 2014-a Andhra Pradesh state ṭhendarh a nih hnua an state tana fund lian ber tur chu a lo pawmsak a, hei vang hian AP chief minister YS Jagan Mohan Reddy pawhin sorkar laipui policy hrang hrangte a thlawpna pawh a lantir fo a, eptu pawlte thiltihnaah pawh an tel ve khat hle.
Nilaini khan eptu party 19-te chuan thuchhuah inṭawm siamin, Parliament building thar hawnna chu boycott an tum tih an sawi a, a hnuah AIMIM hotu Assaduddi Owaisi chuan a hrana thuchhuah siam ve lehin, an party pawhin an boycott tur thu a sawi ve leh bawk. 
Parliament building tharah Sengol dah dawn
Parliament building tharah hian Allahabad musuem-a mi, Sengol (screptre) chu dah a ni dawn a, Lok Sabha Speaker ṭhutna bulah dah a ni ang. 
Sengol hi historical symbol pawimawh tak, India independence nena inzawmna pawimawh tak nei a ni. Britain-in India independence a puan khan, thuneihna hlanchhawnna symbol atan a hmang. 
Parliament building thara Sengol dah tur hi India ramin zalenna a hmuh hlima Lord Mounbatten-a'n India ram prime minister hmasa ber, Jawahar Lal Nehru hnena a hlan kha a ni tih union home minister Amit Shah chuan a sawi. He Sengol hi feet nga-a sei niin, a chhipah 'nandi' bull a awm a, hei hi dikna leh felna rorelna lantirna a ni.