Punjab Police-te kutah Amritpal Singh a inpe

Khalistani separatist hruaitu, March 18 aṭanga police lak aṭanga bibo Amritpal Singh chu nimin khan Punjab police-te kutah a inpe.

Punjab police-te chuan Amritpal Singh chu Moga-ah man a nih thu sawiin, mipuite a chungchangah thu dik lo thehdarh lo turin an chah nghal. Kum 29 mi, Amritpal Singh hi Moga district-a Rode khuaa gurdwara-a awm tih hriat a nihin an umzui nghal a, tlanchhuak thei loa an hual hnuah nimin zing dar 6.45 vel khan police kutah a inpe tih Inspector-General of Police (IGP) Sukchain Singh Gill chuan a sawi.

Man a nih hnuah Singh hi special flight hmangin Assam-a Dibrugarh-ah hruai nghal a ni a, he hmunah a thawhpui mi pariatte chu National Security Act hnuaiah hren mek an ni. He dan hnuaiah hian thubuai siamsak loin kum khat chhung hren theih an ni.

Amritpal Singh hi Diburgarh Central Jail-ah dah a ni a, jail compound-ah venhimna pawh tikhauhin, Black Cat Commando, CRFP leh jail security personnel-te dah an ni. Jail chhungah pawh venhimna hi tihkhauh a ni bawk.

Indian Penal Code (IPC) hnuaiah Amritpal Singh hian case eng emaw zat a nei mek a, heng zingah hian khawtlanga buaina chawk chhuak, tualthah tum, police-te beihna thubuaite a tel. March 18 khan Jalandhar district-a police-ten man an tum laiin a tlanchhe hman a, hemi hnu hian thla khat chuang zet a bibo zui a ni.