Ni khata Covid-19 hri kai mi 1,000 chuang awm leh

India ramah Covid-19 hri kai an pung chho leh ṭan a, Inrinni liam ta khan hri kai hmuh chhuah mi 1,071 an awm thar leh. Hei hi ni 129 hnua ni khata hri kai thar 1,000 chuang an awm lehna hmasa ber a ni.

Union health ministry-in nimina data a tichhuahah, nimin zing dar 8 thleng khan ram pumah hri kai mek, active case hi 5,915 an awm tling leh tawh a ni. Inrinni khan hripui vanga thi mi pathum awmin, Covid-19 hri thihpui hi India ramah mi 5,30,802 an awm tling tawh.

Hri kai tawh aṭanga enkawl dam, recovery rate hi 98.8% niin, thihpui hi 0.01% an ni thung.

Mithiamte chuan tun hnaia hri kai an pun chhoh lehna chhan hi Covid variant thar, XBB 1.16 vang niin an sawi. He variant kai hi India ramah January khan mi pahnih hmuh an ni a, February-ah mi 59 leh March-ah mi 15 kai hmuh an ni tawh.

Kar liam ta khan World Health Organisation (WHO) director-general Tedros Adhanom Ghebreyesus chuan khawvel puma mi maktaduai sarih chuangin an thihpui, Covid-19 hri chu public health emergency ni tawh loin, mipuite chuan seasonal influenza pangngai anga an ngaih chhoh tawh a rin thu a sawi. Hemi rual hian Covid hri laka fimkhur a la ngai reng tih a sawi a, "Mihring nunna titawp thei virus a la ni zel ang a, mahse khawtlang leh hospital system tibuai vek thei virus erawh a ni tawh lo ang," a ti