Punjab police-te'n Khalistani hruaitu Amritpal Singh man tumin an zawng

Punjab police-te chuan India aṭanga inlakhrana Khalistan ram din duhtu, Waris Punjab De hotu Amritpal Singh chu man tumin an zawng mek.

Punjab chief minister Bhagwant Mann chuan Amritpal Singh man tum chungchang hi March 2 khan union home minister Amit Shah nena meeting an neih ṭumin a sawi a, sorkar laipui pawhin Punjab police-te pui tur hian central force pawh a lo tir tawh nia sawi a ni.

Waris Punjab De hi actor leh activist Deep Sidhu-a din niin, amah hi nikum February thla khan motor accident-ah a thi a ni.Hemi hnu hian Singh hi an pawl hruaitu atan hian ruat a ni.

Kum 30 mi, Amritpal Singh hian India ram aṭanga inlakhran a, Khalistan ram din chungchang hi langsar takin a lo sawichhuak fo tawh a ni. Official-te chuan Singh hian pakistan intelligence agency, ISI leh ram danga firfiak pawl ṭhenkhat nen inzawmna ṭha tak an nei niin an sawi.

Singh leh a hote hian thla hmasa khan an thawhpui pakhat chhuah tura phutin silai leh ngunhnamte nen Punjab-ah Ajnala police station an bei a ,police official paruk an hliam a ni. He thil thleng vang hian Punjab sokar pawhin sawisel a tawk nasa hle.

Inrinni liam ta khan Jalandhar-ah Amritpal Singh hi chak taka motorcyle-a a tlan hmuh a ni tih a sawi hnuah, police-te chuan man tumin beihpui an thlak zui nghal a, mahse police-te hi a la pumpelh thei zel a ni. Police-te chuan Singh-a thawhpui hnai tak mi pasarih an man tawh a, Waris Punjab De member eng emaw zat chu thu zawhfiah turin an hreng mek bawk. Jalandhar-ah hian Singh-a car man a ni bawk a, a motor chhungah hian silai leh a mu tam tham tak hmuh tel a ni.

Amritpal Singh man tuma zawn mekah, buaina leh boruak ṭha lo thleng thei venna turin state sorkar chuan Punjab state-ah mobile internet, SMS leh dongle service tihtawp chu vawiin thleng atan pawhsei a ni tih a sawi. Inrinni leh nimin khan heng service-te hi tihtawp an lo ni tawh a ni.