IT Dept-in BBC office dap chhunzawm

Income Tax department chuan New Delhi leh Mumbai-a BBC office chu nimin khan a ni hnihna atan an dap chhunzawm.

BBC-in 2002 Gujarat intualvuakna leh, he thil thlenga prime minister Narendra Modi inhnamhnawih dan documentary, 'India: The Modi Question' a tihchhuah hnuah khawpui pahniha BBC office-te dap a ni hian sawizui leh sawisel pawh a hlawh hle. Sorkar lam chuan chhiah kaihhnawih thilah office hi dap niin a sawi thung.

IT official-te chuan BBC office an dap leh zirchian chungchangah official-a thuchhuah an la nei lo a, Thawhlehni aṭang khan heng office pahnihah hian an la awm chhunzawm a ni.

Sorkar laipui chuan 'survey' neih zawh hunah chanchin chiang zawkin tihchhuah a ni dawn tih a sawi a, union minister Anurag Thakur chuan, "IT department hian a zirchian meknaah thil dik tawk lo awmte a hmu a ni. Hengte hi nakinah chiang zawkin information a la tichhuak dawn a ni," a ti.

Official-te chuan internationtal taxation leh BBC subsidiary firm-te hnena sum transfer chungchangte chhui chian niin an sawi a, hriattirna an lo pe lawk chungin BBC lam chuan an thawhpui ṭha lo niin an sawi. Hetih lai hian Delhi-a BBC office-a thawkte chuan an phone leh laptop-te laksak vek an nih vek bakah, finance department-a account leh data pawh ensak vek an ni tih an sawi. BBC chuan an hnathawkte hnenah sorkar lam thuneitute ṭha taka thawhpui tura chahin, an buaina neih mek chu a rang thei anga chinfel a nih an beisei thu a sawi.

IT department-in BBC office an dap chungchangah hian ram chhunga eptu party leh pawl hrang hrang bakah US, Amnesty International, Committee to Protect Journalists (CJP) leh Reporters Without Borders (RSF)-te pawh an ṭawngchhuak. US chuan BBC office dap a nih chungchang hi an ngaihven a, mahse thutlukna siamtu tur erawh an ni lo tih sawiin, hemi rual hian khawi hmunah pawh press mite zalenna chu an ngai pawimawhin an thlawp tih state department thupuangtu Ned Price chuan a sawi a ni.

Amnesty International chuan hetianga office dap a ni hi freedom of expression beihna a ni tiin, India rama Amnesty hotu hlui, Aakar Patel chuan India thuneitute chu BBC chungah inlulingin, sorkar lam sawichhetute aw chhuah tur danbehna atan Income Tax department chu hmanruaah hman a ni fo a ni, a ti.

Committee to Protect Journalists (CPJ) pawhin India sorkar chu journalist-te a nekchepna titawp turin a ngen a, India ram thuneitute chuan an duh loh zawng news chhuakte beihlentna atana tax investigation tih chu an hmang a ni, tiin BBC hnuaia thawkte an zarbuaina chu titawp a, khawvela democracy ram lian ber a nih angin zalenna chu ngai pawimawh turin an ngen.

RSF pawhin Narendra Modi chungchanga documentary tihchhuah khap a nih hnua tax authority lamin BBC office an dap zui leh nghal chu phuba lakna, beih letna anga ngaih theih a nih thu a sawi bawk.

Congress party president Mallikarjun Kharge chuan BBC office dapsak an ni chu freedom of press rahbehna a ni tiin, Aam Aadmi Party (AAP) chuan prime minister Narendra Modi chu 'dictatorship' dinhmun thleng tawhah an puh bawk. AAP hotu Arvind Kejriwal chuan democray ramah media chu pillar palina an ni a, media rahbeh chu mipuite aw rahbehsakna a ni, a ti. BJP sawiseltu chu CBI, ED leh IT-te chhuitir an ni zui nghal zel niin a sawi.

Editors Guild of India (EGI) pawhin BBC office-a Income Tax survey neih a ni chu sorkar lai sawiseltu, media outlette vau leh rikrapna tura sorkarin a agency-te a hman ṭhin a chhunzawmna zel a ni, an ti.IT Dept-in BBC office dap chhunzawm