Nitish Kumar-an ‘Samadhan Yatra’ nei

Bihar chief minister Nitish Kumar chuan nimin aṭang khan ‘Samadhan Yatra’ a nei a, yatra thawh khatna hi January 29 thleng a nei ang.

Yatra thawh khatna hi West Champaran district-a Valmikinagar aṭangin a kal ṭan a, a kal chhung hian sorkarin scheme a kalpui hrang hrangte a thlir zui nghal dawn a ni.

Tun hnaiah Bihar-a zu chhe in vanga mi eng emaw zatin nunna an chan vang leh, crime rate a san avangin BJP chuan JD(U) hruaitu, Nitish Kumar kaihhruai sorkar hi an bei nasa hle. Tuna yatra a neih pawh politics khelhna hmanrua man niin an puhsak.

CM Kumar-a'n yatra a neih hi official programme a nih avangin, hemi chhung hian public meeting leh rally a nei lo ang. Hetih lai hian pawl thlan bikte erawh meeting neihpuiin, tualchhunga harsatna an neihte an sawipui dawn a ni. District level review meeting pawh neiin, district tin in-charge minister, chief secretary, DGP leh officer-te an tel ṭhin ang. Heng meeting hi minister-te hian video conferencing hmangin an lo zawm ṭhin dawn a ni. Kumar hian kum 2005 hnua yatra a neih ṭum 14-na tur a ni.

Kumar chuan yatra a neih chhan sawiin, state sorkarin scheme/project a kalpui hrang hrang dinhmun enfiahna tur a ni, a ti. Hnathawhna kawnga mamawh leh ṭul dang awmte enfiahin, chinfel zel an tum dawn tih a sawi. Hei vang hian a yatra neih pawh hi Samaadhan (Solution) Yatra tih a ni, a ti.