Union cabinet-in National Green Hydrogen Mission pawm

Union cabinet chuan Nilaini khan Rs vbc 19,744 senna tur National Green Hydrogen Mission a pawm. He mission hmang hian India chu Green Hydrogen siamchhuah, sawngbawl leh thawnchhuah kawngah khawvel huapa hmunpuia siam tum a ni.

He hmalakna hian khawvela greenhouse gas tichhuaktu lian ber zinga mi, India ram chu kum 2070-a carbon tihchhuah awm lohna rama siam tumna kawngah nasa takin a pui thei dawn bawk.

Union Minister Anurag Thakur chuan prime minister Narendra Modi kaihhruai union cabinet-in National Green Hydrogen Mission a pawm thu reporter-te hnenah a puang a ni. He mission atan hian Rs vbc 19,744 ruahman niin, heta ṭanga Rs vbc 17,490 chu SIGHT programme tan duan a ni a, pilot project atan Rs vbc 1,466, R&D atan RS vbc 400 leh mission kalpuina tur dang atan Rs vbc 388 dah a ni.

He mission hmang hian renewable energy siamchhuah chu 125GW velin tihpun belh theih beisei a ni a, hei hian fossil fuel lakluh ngai pawh tihniamin, mission kaltlang hian sorkar chuan fuel lakluh ngai zat hi Rs vbc nuai 1 chuangin a tihtlem theih a beisei.

Sorkar laipui chuan kum khatah green hydrogen 5 MMT (million metric tonnes) tal siamchhuah a tum a, he sector-ah hian hna thawh tur nuai 6 chuang zet siam theih a beisei bawk a ni.