J&K-a Hindu chhungkuate beih an nih hnuah Sorkar laipuiin CRPF 1,800 a thawn lut

Jammu and Kashmir-a Rajouri district-a Hindu chhungkuate firfiakten an beih hnuah,sorkar laipui chuan CRPF (Central Reserve Police Force) company 18, sipai 1,800-te a thawn lut nghal.

Rajouri-ah hian kar hnih chhungin firfiakte chetna hi a thleng a, hei vang hian district thuneitute chu mipuite venghim zo loah puhin, lungawi lohna lantir a ni.

Indian Army, police leh CRPF-te chuan Hindu chhungkuate beitu firfiakte hi ngawrh takin an zawng mek a ni.

Pathianni zan leh Thawhṭanni zing khan firfiakte hian Upper Dangri khuaa Hindu mite beiin, pawikhawihna thleng hmasa zawkah hian mi pali an thi a, a hnuhnung zawkah mi paruk an thi. Thi zingah hian naupang pahnih an tel. Rajouri district-ah hian kar hnih chhunga firfiakte kuta civil mite thihna a thlen ṭum thumna a ni. December 16 khan army camp pawn lamah civil mi pahnih thah an lo ni tawh bawk.

Jammu and Kashmir-ah hian firfiakte an chet fo avangin CRPF pawh ṭhahnem tak dah an ni. CRPF-in sipai a neih zat aṭanga hmun thuma ṭhena hmun khat,battalion 70 chuang an awm mek a ni.

Rajouri-a Hindu chhungkuate beih an nih avang hian Sanatan Dharam Sabha, Vishwa Hindu Parishad, Bajrang Dal leh Hindu Jagran Manch-te chuan Nilaini khan district pumah bandh an huaihawt a, Udhampur, Akhnoor, Katra, Reasi, Samba, Kishtwar leh Doda district-ahte lungawi lohna hi lantir a ni bawk.