Indian Consulate kawta nawrh huaihawttu man
Sri Lanka-a Indian consulate kawta nawrh huaihawttu, Sri Lanka President hlui Mahinda Rajapaksa fapa upa zawk leh Parliament member pahnihte chu man an ni.
Sri Lanka sorkarin an ram chhim lam, Hambantota-a Mattala Mahinda Rajapaksa International Airport chu Indian company hnenah hlan a tum a, hei hi duh loin eptute chuan Hambantota-a Indian consultate kawtah lungawi lohna an lantir a ni.
Nawrh huaihawt vang hian Rajapaksa-a fapa, Namal Rajapsaka leh midangte chu police-ten manin, public property tihchhia leh Hambantota judicial area-a nawrh huaihawt khapna thupek bawhchhiaah puh an ni. Hambantota magistrate-ah hruai nghal niin, October 16 thleng Tangalle remand prison-a dah tura tih an ni.
Eptute chuan sorkarin an thil neihte ramdang company hnena hralh a tum chu an duh lo tih an sawi a, Parliament-a sawihona neihah pawh Namal Rajapaksa chuan sorkarin airport hralh a tum chu ramdangte tan an ram chu infiamna hmuna chantirna tur a ni, a ti. Sri Lanka sorkar hian Hambantota sea port-a hnathawh phalna chu China hnenah a lo pe tawh bawk a ni.
Hambantota-a sea port leh airport hi Rajapaksa a president laia infrastructure project lian a siamte an ni a, he hna thawhna atan hian China aṭangin commercial loan a puk a ni.