UP sorkarin Rahul Gandhi zin hun sawn turin ngen

3rd October, 2017

Congress vice president Rahul Gandhi chuan a Lok Sabha constituency, Uttar Pradesh-a Amethi bial chu October 4-6 hian tlawh a tum a, mahse Amethi district thuneitute chuan a zin hun tur hi sawn turin an ngen.

Amethi district thuneitu chuan district Congress hotu hnenah lehkha thawnin, district chhungah dan leh thupek khauh zawka kenkawh a nih theih nan Rahul Gandhi zin hun tur chu sawn turin an ngen. Lekha an thawnah hian Rahul Gandhi hian a bial hi a tlawh a nih chuan venhim hna thawk turin police

ṭhahnem tham tak duty tir an ngai dawn a, mahse October 5 hian hmun hrang hrangah Durga Puja/Dussehra leh Muharram hman a nih dawn vangin Rahul-a zin tum hun hi a remchang lo niin an sawi. Hei vang hian October 5 hnu lamah a bial hi tlawh zawk turin an ngen a ni.

Uttar Pradesh Congress senior leader Akhilesh Singh chuan an lehkha thawn hi sawiselin, Chief Minister Yogi Adityanath-a kaihhruai BJP sorkar chuan kawng hrang hrangin Gandhi-a'n a bial a tlawh tum hi an dang a ni, a ti. UP sorkar chuan Rahul-a'n Amethi bial a tlawh tur hi duh loin, state sorkar hnuaia mipuite harsatna tawh hrang hrangte a sawichhuah a hlauthawng a ni, a ti. October 4-ah chuan festival lawmna tam zawk chu a zo tawh dawn a, thuneitute chhuanlam chu thu tlingah a ngaih loh thu a sawi bawk.

Hetihlai hian state BJP thupuangtu Rakesh Tripathi chuan Rahul Gandhi chu a bial mipuite tana hna thawk ṭha loah a puh thung a, a bial hmasawnna tur scheme hrang hrang alo tiam tawhte chu tihhlawhtlin lohin an awm a ni, a ti.

Rahul Gandhi hi Congress president-ah hlankai a ni dawn hnai tawh nia sawi a awm a, Diwali zawhah president-ah hian dah a ni dawn niin a thawhpui hnai tak Sachin Pilot chuan a sawi. Pilot chuan Congress party member leh worker-te chuan Rahul Gandh-a'n an party a kaihhruai hun hi an nghakhlel vek niin a sawi. Hetih lai hian Rahul Gandhi chuan party president leh a nu ni bawk Sonia Gandhi thlaktu atana ruat tawp hi a lo nia sawi a ni a, officer bearer leh worker-te'n a thlana an thlan tlin ngei a duh nia sawi a ni.