Supertech-in twin tower awmnaah housing project siam an tum

Realty firm, Supertech Ltd chuan Noida-a twin tower tihchim tak awmna hmunah housing project thar siam a tum. Thuneitute lamin an ruahmanna hi an pawmsak loh chuan ram leina leh senso dangte pekkir leh vek tura an beih tur thu a sawi.

Supertech chairman RK Arora chuan, tower pahnih ṭhiahna bawlhhlawhte thenfai kim a nih hunah, company chuan Noida development authority hnenah housing project siamna tur hian dilna a thehlut dawn a ni, a ti.

Meter 100 dawna sang, twin tower - Apex leh Ceyane-te chu Emeral Court huam chhunga sak a nih danah dan an bawhchhia tih a sawi a, Supreme Court-in ṭhiat tura a tih hnuah, August 28 khan puakthei thil kg 3,700 chuanga rit hmangin tihchim a ni.

RK Arora chuan, Noida thuneituten Noida Sector 93A -ah housing project siamna turin ram acre 14-a zau an pek thu leh, twin tower sakna atan hian acre 2 hman a nih thu a sawi. Twin tower sakna hmun chu company ta a ni tawh a, he hmunah hian in dang sakna tur project siam leh an tum tih a sawi.

Twin tower tihchhiat vang hian an company-in Rs vbc 500 an hloh thu Arora hian a lo sawi tawh bawk. Court thupek angin company hian twin tower-a flat lo lei tawhte chu an leina sum bakah a pung 12% pe kir vek turin a ti a ni. Hei bakah hian tower awmna biala Residents Welfare Association hnenah harsatna hrang hrang an thlen avangin Rs vbc 2 pe turin a ti bawk.

Hetih lai hian Emeral Court housing society hnuaia chengte chuan Supertech Group-in sak an tum leh chu an dodal zel dawn tih sawiin, a ṭul chuan court-ah pawh an kal tur thu an sawi.