Azad-a'n a party din tur hming mipuiin an phuah dawn tih a sawi

Congress party chhuahsantu, an hruaitu hlun Ghulam Nabi Azad chuan nimin khan Jammu-ah rally a huaihawt a, political party thar a din tur leh an flag tur chu mipui lamin an thlang dawn tih a sawi.

Kum 73 mi, Jammu and Kashmir chief minister hlui hian kum 40 zet a lo tel tawhna, Congress party a chhuahsan hnuah kar liam ta khan political party thar a din tur thu a sawi a ni. Party unit hmasa ber chu J&K-ah din a nih tur thu leh, party hming leh flag pawh Ganga-Jamuni culture nen inzula siam an nih tur thu a sawi bawk.

Azad chuan a party dinin hma a lakna lian ber tur chu J&K state puitlinga dah let leh te, J&K-a ram leh hna inpek chungchangah tualchhung mite dikna humhalh sak te, hna thawh nei lo pung zel chinfel dan ngaihtuah te, Kashmiri Pandit-te him taka an kir leh theihna tur ngaihtuahte a nih thu a sawi. J&K mipuite chu an inkara inhuatna awmte dah bo a, dinhmun thar chuangkai tura a hmalaknaah thawhpui vek turin a sawm a ni.