Congress-in Delhi-ah rally an huaihawt

Congress party chuan nimin khan ram chhunga thil man sang zel duh lohna lantirin, Delhi-a Ramlila Maidan-ah Mehangai Par Halla Bol rally an huaihawt.

Rahul Gandhi chuan rally-ah hian thu sawiin, prime minister Narendra Modi kaihhruai BJP sorkar a din hnuah, ram chhungah thinurna leh inhuatnate nasa takin a pung chho a ni, a ti. BJP leh RSS chu ram ṭhendarh tu, mipuite rilruah hlauhna tuhtuah a puh.

Gandhi chuan, "Thil man sang zel leh hna nei lo pung zel hlauhna a nasa zel a, hei hian inhuatna pawh a thlen phah zel a ni. RSS leh BJP chuan ram an ṭhendarh a, hetianga hlauhna leh inhuatna lo pung zel hi industrialist pahnih chauhin an hlawkpui thung," tiin a sawi.

Party hruaitu dang eng emaw zatin thu an sawi bawk a; Delhi, Haryana, Uttar Pradesh leh hmun dang aṭangin party worker tam tham tak an kalkhawm a ni.

Congress rally huaihawt dawn vang hian Delhi police chuan Ramlila Maidan leh a chhehvelah venhimna khauh takin an kalpui. Rally neihna hmunah hian police-te bakah paramilitary force pawh dah tel an ni a, ground entrypoint-ah metal detector-te hman a ni.

August 17-23 chhung khan Congress party hian assembly constituency hrang hrangah ram chhunga thil man sang zel, unemployment rate sang zel leh food items-a GST lak a nih chungchangah Meghangai Chaupal, interactive meeting an lo buatsaih tawh bawk a, booklet-te an sem bawk a ni.

Party President atan Rahul Gandhi duh
Nimina Congress worker pungkhawmte hian an party president atana Rahul Gandhi an duh tih thuziakte an keng lang bawk.

Congress party hian October-ah party president an thlang dawn a, hetih lai hian party hotu lu ber atana Rahul Gandhi dah duhtu thawm a ring hle. Party hruaitu zinga tam tak pawhin langsar takin President-ah Rahul Gandhi an duh thu an sawilang bawk.

Rahul Gandhi hian Parliament inthlanpuia Congress party an chet chhiat zawn avangin kum 2019, June thla khan party President a nihna aṭangin banna a thehlut a ni. Hemi hnu pawh hian party hotu atana awm chhunzawm zel tura nawrna nasa hle mah se, a hnar zel a ni.

Senior leader - Mallikarjun Kharge leh Salman Khurshid-te chuan Rahul Gandhi chu biak a, hruaitu hna hi pawm tura hmin ngei an tum tih an sawi.