BJP MP Varun Gandhi chuan social media lama video darh mekah Rs 20-a national flag an lei loh chuan ration an lak phalsak an ni lo tih an sawi avangin central-a BJP kaihhruai National Democratic Alliance (NDA) sorkar a sawisel leh. 
Varun Gandhi hian tun hnaiah BJP sorkar thiltih dan hi a lo sawisel fo tawh a, sorkar laipuiin kum upa zawkte tana rel chuan man tihtlawmna a tihtawp tak te, food item-a GST lak a ni leh, sipai lakna scheme thar 'Agnipath scheme' a siamte chu na takin a lo sawisel tawh a ni. 
Haryana-a news portal, Karnal-in video a tihchhuahah mi tam tak chuan ration la tura an kal chu national flag hi Rs 20 in leih luihtir an nih thu an sawi. Ration dawr nghaktute chuan ration la apiangte hnenah an ina national flag tar tur hi lei tir tura thupek an dawn thu an sawi ve bawk. "Flag lei duh lo chu ration pe lo tura hrilh kan ni a, thupek kan zawm mai a ni," an ti ve thung. 
NDA sorkar hian India zalenna champha vawi 75 lawmna, Azadi Ka Amrit Mahotsa hnuaiah ram chhung mipuite August 13-15 chhunga an chenna ina national flag zar ṭheuh tura tiin, hemi atan hian 'Har Ghar Tiranga' campaign a kalpui mek a ni. 
Varun Gandhi chuan video darh chungchang hi sawiin, India zalenna lawmna chu mi retheite tana phurrit a ni dawn tih leh thil pawi tak a nih tur thu a sawi a, "Ration card holder-te chu national flag lei luihtir an ni a, an lei loh chuan an chaw ei tur hrek sak an ni. Hei hi thil zahthlak tak a ni," tiin a twitter-ah a ziak.