Bihar-a Janata Dal (United)-in ṭangrual sorkar an siampui, BJP an thawhpuina titawp a, Thawhlehni tlaia chief minister aṭanga Nitish Kumar-a'n banna a thehluh hnuah, JD(U) leh party dangte chuan ṭangrual sorkar thar an din. Kum 71 mi, Nitish Kumar chu CM atan nimin khan lakluh leh nghal a ni. 
BJP nena an thawhdunna an tihtawp thu a puan hnuah, Thawhlehni tlai khan Nitish Kumar chuan Governor hnenah CM a nihna aṭanga banna hi a thehlut a ni. Hemi hnu hian eptu party, Rashtriya Janata Dal (RJD) leh party dangte nena ṭangrual sorkar thar siam turin inremna an siam leh nghal bawk. Nitish Kumar chuan sorkar thar chu party pasarihte thawhhonna, "Mahagathbandhan (Grand Alliance)" a ni dawn tih a sawi. 
Mahagathbandhan (Grand Alliance) sorkarah hian JD(U) leh RJD bakah Congresss, Left party - CPI leh CPIML leh party tenau dang an tel. Ṭangrual sorkar thar hian seat 242 awmna state assembly-ah MLA 164 a nei a ni. RJD hi party mala seat ngah ber niin, seat 80 an nei a, JD(U) hian seat 46 an nei. 
CM aṭanga banna a thehluh tuk, nimin chawhnu lamah khan Nitish Kumar chu Bihar chief minister atan rinawmna thu tiamtira lakluh leh nghal a ni a, CM atana lakluh a nih ṭum riatna a ni. RJD hotu Tejashwi Yadav chu deputy chief minister atan lakluh a ni bawk a, minister turte erawh lakluh an la ni lo. August 15-ah minister thar turte chu lakluh an ni dawn nia sawi a ni. 
BJP-JD(U) sorkara deputy chief minister, BJP hruaitu Tarkishore Prasad chuan JD(U) nena an thawhdunna tihṭhat tum hian theihtawp an chhuah a, union home minister Amit Shah pawhin Nitish Kumar hi a bia a ni, a ti. Mahse Nitish Kumar chuan boruak siamṭhat tum loin mipuite duhthlanna chu a phatsan ta zawk a ni tiin, nimin khan BJP hian district hrang hrangah lungawi lohna an lantir zui bawk. 
Rajya Sabha-ah nghawng nei dawn JD(U) in BJP a thawhpuina a tihtawp tak avangin, Parliament Upper House, Rajya Sabha-a NDA seat neih zat pawh a nghawng tel dawn a ni. 

Rajya Sabha-a member 237 awm mekah, BJP kaihhruai NDA hian member 119 a nei a, mahse an zinga JD(U) MP pangate chuan NDA hi chhuahsanin, eptu lamah an tel dawn ta a ni. 
Maharashtra-a Shiv Sena an phel hnuah, Eknath Shinde lamṭang leh BJP-ten sorkar thar siam mah se, Rajya Sabha-a Shiv Sena MP pathumte chuan Uddhav Thackeray lam an thlawp avangin NDA lamah an tel duh chuang lo bawk. 
Rajya Sabha-ah hian seat ruak pariat awm mekin, Jammu & Kashmir-ah seat pali, Tripura-ah seat pakhat leh nominated category-ah seat pathum a ruak.