'Agniveer'-te CAPF leh AR-ah duhsak an ni ang : MHA

Ministry of Home Affairs (MHA) chuan sorkarin sipai lakna scheme thar a siam, Agnipath scheme hnuaia short-term contract-a Army, Navy leh Air Force-a lak, Agniveer-te chu central armed police forces (CAPFs) Assam Rifles sipai laknaah duhsak an ni ang tih nimin khan a sawi.

Thawhlehnia sorkarin recruitment scheme thar a tlangzarh, Agnipath scheme hnuaiah hian kum li chhung sipaiah a ṭan theih dawn a, he scheme hmang hian ṭhalai tam zawk chu sipaia an luh theih beisei a ni bawk.

Armed forces pathum -army, navy leh air force-ah Agnipath scheme hnuaiah hian kumin chhungin sipai atan kum 17 - 21 inkar mi 46,000 lak thar tum a ni.

Madhya Pradesh chief minister Shivraj Singh Chouhan chuan Agniveer-te hi state police laknaah duhsak an ni dawn tih a sawi ve bawk. Chouhan chuan Agnipath scheme chu ṭha a tih thu sawiin, "He scheme hnuaia sipai lo ṭang tawhte chu Madhya Pradesh police recruitment-ah dah pawimawh hmasak an ni dawn a ni," a ti.

Uttar Pradesh chief minister Yogi Adityanath pawhin state chhunga police leh a kaihhnawih service danga thawktu laknaah Agniveer-te chu ngaih pawimawh an ni dawn tih a sawi bawk. UP sorkar chuan India ram tana an thawh hnuah, Agniveer-te chu police lak tharnaah a duhsak dawn a ni, tiin BJP sorkar chuan ṭhalaite hmakhua chu a ngai pawimawh hle tih a sawi zui nghal bawk.