President chuh tumte tan nomination thehluh theih

India President thar thlanna neih tura chuh tumte tan, nimin aṭang khan nomination paper thehluh theih a ni ta.

Election Commission of India chuan President thar thlan hun atan hian July 18 a lo ruat tawh a ni.

Nomination paper hi June 29 thleng thehluh theih a ni ang a, June 30-ah paper lutte enfiah niin, July 2 thleng inhnukdawk duh tan hun hawn a ni bawk ang. July 21-ah vote chhiar a ni ang. President ṭanglai, Ram Nath Kovind term hi July 24-ah a tawp dawn a ni.

President hi Parliament leh state tina legislative assembly-a elected member, electoral college in an thlang dawn a, nominate member-te erawh chuan an thlang ve thei lo. Electoral college-ah hian member 4,909 an awm a ni. Vote hi Parliament House leh state legislative assembly-ah thlak a ni ang a, vote chhiar erawh Delhi-ah neih a ni thung ang.

Eptu party-te chuan President thar tur thlannaah hian candidate inṭawm, joint candidate siam tumin hma an la a, Thawhlehni khan party ṭhenkhat hruaitute chu an inhmukhawm. Nimin khan West Bengal chief minister Mamata Banerjee chuan epty party meeting hi a ko bawk a, mahse eptu party-te hi an inlungrual kim thei lo nghal a ni. Telangana Rashtra Samithi (TRS) leh Aam Aadmi Party (AAP) an tel dawn lo tih an sawi nghal a ni. TRS chuan Congress nena inthurual an duh lo tih sawiin, AAP pawhin President candidate tur puan a nih hunah an thlawp dawn leh dawn loh an la ngaihtuah chauh dawn tih a sawi thung.

Central-a rorellai, BJP kaihhruai National Democratic Alliance (NDA) chuan President Ram Nath Kovind chu a nominate nawn tawh dawn lo nia sawi a ni a, mahse an candidate tur erawh an la tifel lo.