ED-ah a ni 3-na atan Rahul Gandhi inlan leh

Congress party hruaitu Rahul Gandhi chu National Herald newspaper kaihhnawih money laundering case-ah nimin khan thu zawhfiah turin Enforcement Directorate (ED)-ah a inlan leh.

Delhi-a ED headquarters-ah Rahul Gandhi hi nimin chawhma dar 11.35 velah a thleng a,a farnu Priyanka Gandhi Vadra chuan a ṭawiawm leh a ni.

Congress party worker-te chuan ED office pawnah leh party headquarters-ah BJP laka lungawi lohna leh, Rahul Gandhi an thlawpna an lantir chhunzawm zel. Youth Congress leh Mahila Congress worker ṭhenkhatte chu police-te hnuksawnin, bus-ah an phur sawn a ni.

Party hruaitute chuan press conference neiin, BJP kaihhruai sorkar laipui chuan Congress worker-te chu an party office-ah ngei pawh an kal tur an dan tir niin an sawi. Delhi police-te chu BJP tan bika thawktu anga maiin an che niin party senior leader, Chidambaram chuan a sawi.

ED-in thu zawhfiah tura Gandhi a ko chu rorellai, BJP-in eptute aw chhuah thei loa hrek beh a tumna, politics phuba lak a tumna niin Congress party chuan an puh.

Thawhṭanni leh Thawhlehni khan Gandhi hi ED office-ah hian darkar 21 chhung thu zawhfiah alo ni tawh. A statement-te chu agency official-te chuan Prevention of Money Laundering Act (PMLA) hnuaiah an record a ni.

Thawhlehnia thu zawhfiah a nih hnuah, Rahul Gandhi leh a farnu Priyanka Gandhi Vadra-te chu an nu, Sir Ganga Ram Hospital-a awm mek, Sonia Gandhi hmu turin an kal tlang nghal a ni. Sonia Gandhi hi Covid-19 hri a kai tih hmuh chhuah a nih hnuah, Pathianni khan damdawi-inah dah a ni a, mahse ngaihtuahawm a ni lo niin party thupuangtu chuan a sawi.