Rahul Gandhi-an PM eiruah a puh

France media ten aviation company Dassault chuan India sorkar nena Rafale deal an siam theihna turin Anil Ambani-a company chu sumdawnna lama a thawhpui tura a thlan a ngaih thu an tarlan hnuah, Congress President Rahul Gandhi chuan Prime Minister Narendra Modi chu na taka bei zuiin, eiruah a puh a, 'Anil Ambani tana PM a ni" a ti.

Mediaport-in report a tihchhuahah, Dassault top official Loik Segalen chuan nikuma staff-te hnena thu a sawihah, Reliance Defence nena thawhdun chu Dassault Aviation tan chuan India sorkar hnen aṭanga Rafale contract hmuh theihna tura thil tih ngai a ni tih a sawichhuak niin a tarlang.

Nimina New Delhi-a Congress office-a press conference a neihah, Rahul Gandhi chuan France media-te report chungchang hi sawizuiin, "He thil aṭang hian prime minister chuan a eiru ngei a ni tih a chiang hle a ni. Prime minister hian a eiru ngei a, mahse thil pawi tak chu a campaign-na zawng zawngah eiruk dona lam hlir a sawi thung a ni", a ti. Modi chu mipuite tana prime minister ni loin, Anil Ambani tana prime minister a ni, a ti bawk.

Dassault leh Reliance company thawhdunna, Dassault Reliance Aerospace Ltd (DRAL) hi kum 2017, February 10 khan siam a ni.

Rahul Gandhi chuan Defence Minister Nirmala Sitharaman-in France ram a tlawh thut thu leh, Dassault company hmun a tlawh chungchang a zawt bawk a, hmanhmawh taka a tlawh thut chhan chu mipuiten hriat an duh a ni, a ti. Defence Minister hi ni thum cham turin nimin khan France-ah a zin a ni.

Sorkar laipui leh France sorkarin Rafale fighter jet leina tura inremna an siam chungchangah hian Supreme Court-ah petition pawh thehluh a ni tawh a, Supreme Court chuan inremna siam a nih dan kimchang report thehlut turin sorkar a hriattir a ni. Congress party chuan he inremna siam hi langtlanga kalpui a phut thu sawiin, inremna siamna turah hian PM Modi-a kaihhruai sorkar chuan Hindustan Aeronautical Limited (HAL) dilna chu ngaihthahin, Reliance Defence chu duhsakna uchuak taka lantirah a puh a ni.