Covid vanga state inthlan ṭhulh duh mipui zingah 55% awm : Survey

State pangaa Assembly election hmachhawn mai tur an awm laiin, ramchhungah Covid-19 kai an pun chhoh zel avangin mipui 55% chuan inthlan chu thla khat emaw thla hnih emaw tala sawn hlat an duh tih Local Circle-in zirchianna an neih aṭangin an tarlang.

Mi tam tak chuan India rama darh mek BA.2 sub variant Omicron chu state-a inthlan neihnaa mipui punkhawmna avangin hri leng thawh thumna chuan hun rei zawk a daih phah thei tih an sawi.

He zirchiannaah hian India rama district 292 aṭangin mipui 10,310 ngaihdan lak a ni. Mi tam zawk chuan hri leng thawh thumnain 'peak' a thlen hmaa punkhawmna leh inthlan huaihawt chuan hri nasa zawkin a tihdarh theih an ring.

Assembly inthlan neihna tur Uttar Pradesh, Punjab, Uttarakhand, Manipur leh Goa te chu test positivity rate (TPR) 10% chunglam vek an ni a, kar tinin san lam a pan zel bawk a ni. Uttar Pradesh chuan a kar hmasa leh aiin kar liamta khan nitina hri kai thar chu 40% in a pun belh. Punjab-ah 41% in a pung thung. Punjab-a district 22 aṭanga 19 chuan TPR 10% chunglam an nei vek a, an zinga district pariat chuan TPR 20% chuang an nei bawk a ni. Manipur leh Uttar Pradesh-a district 11, Goa leh Uttarakhand-a district paruk te chuan kartina TPR 10% chunglam vek an nei bawk a ni. Ram pum huapa district 52% emaw district 379 chuan weekly positivity rate 10% chunglam an nei a, chung zinga 40% chu inthlan neihna tur state panga-a mi an ni.

Election Commission chuan assembly inthlan neihna tur state pangaah January 8 aṭang khan political party-te chu roadshow leh physical rally chu January 15 thleng neih a lo khap tawh a, he khapna dan hi January 22 thleng pawhsei leh a nih hnuah, January 31 thleng atan pawhsei chhunzawm leh a ni.