Delhi sokarin weekend curfew a hlip

Delhi sorkar chuan hri kai thar an tlakhniam ṭan avangin kartawpa curfew a puan chu a hlip a, restaurant leh cinema hall-te pawh 50% capacity-a hawn a phalsak a, bazar inhawn chhawk pawh a titawp bawk.

School erawh chu khar chhunzawm a la ni dawn a, zan lam curfew pawh puan chhunzawm a la ni bawk.

Delhi sorkar leh Lieutenant governor Anil Baijal-ten meeting an neihah he thutlukna hi an siam a ni.

Dawr chu nitin an inhawn phalsak an ni a, inneihna lawmnaa tel thei zat pawh 50 aṭangin 200-ah tihpun a ni bawk. Sorkar office-te chu thawktu 50% in an la kal dawn a, private office-te pawh staff 50% kala hawn phalsak an ni bawk.

Delhi Disaster Management Authority (DDMA) chuan khuahkhirhna thlahdul ni mah se mipuite chu hri laka inveng a, fimkhur taka awm chhunzawm zel turin a chah. Pawn chhuahnaah mask vuah reng tur leh, social distancing dante zawm ṭha turin a ngen.

Delhi-ah hian nimin khan hri kai thar 5,000 an tling tawh lo a, positivity rate pawh 10% hnuai lam a ni thei tawh dawn niin health minister Satyendar Jain chuan a sawi. Nilaini khan hri kai thar hi mi 7,498 awmin, Thawhlehni khan 6,028 an awm bawk. Nilaini khan hri kai mek, active case 38,315 an awm a ni.

Ram pumah hri kai thar nuai 2.86 awm
India ramah Nilaini khan hri kai thar 2,86,384 an awm belh leh a, a hma ni aiin hri kai hi 0.1% in an tlem a, a zawnin ni thum chu hri kai thar hi nuai thum an tling tawh lo a ni.

Hri kai zat tlemin tlahniam mah se positivity rate erawh chu a la sang hle a,19.5% a la ni. Weekly positivity rate pawh 17.75% a ni bawk.

Nilaini khan hripui vangin mi 573 an thi leh. Covid hri leng thar leh meka hripui vanga thi zinga 60% chu vaccine la lo leh, vawi khat chauh la te an ni.