TN cabinet-in Rajiv Gandhi thattute chhuah rawt

Tamil Nadu cabinet chuan Pathianni khan state Governor Banwarilal Purohit-a hnenah Prime Minister hlui Rajiv Gandhi-a thattua puha thiam loh chantir mi pasarihte chu chhuah turin an rawt.

Pathianni khan Chief minister K Palniswami kaihhruaina hnuaiah Tamil Nadu cabinet meeting hi neih a ni. Meeting-a Rajiv Gandhi-a thahnaa inhnamhnawiha puha damchhunga tang tura hrem, Murugan, Santhan, Perarivalan, Jayakumar, Ravichandran, Robert Payas leh Nalini te chungchang ngaihtuah a ni. Heng mite hi an vaiin kum 27 zet lung-in an tan tawh avangin chhuah zalen turin Governor hnena rawt an rel nghal bawk. An thurel hi meeting zawh hian Governor hnenah thawn nghal a nih thu minister D Jayakumar chuan a sawi.

Cabinet meeting hian Chennai central railway station chu MG Ramachandran Central railway station tia thlak an rawt bawk a, hei bakah sorkar laipui chu an state chief minister J Jayalalihtha-i hnenah chawimawina, 'Bharat Ratna' hlan turin an phut bawk.

Tamil Nadu sorkar hian Rajiv Gandhi thahna thubuaia thiam loh chantir te hi chhuah turin a lo phut tawh a, hemi chungchangah hian September 6 khan Supreme Court chuan state sorkar hnenah State Governor rawn turin a lo hriattir tawh a ni.