Ramchhungah fuel man san belh zel ; India pawisa hlutna tlahniam

Ramchhungah fuel man a san belh zel laiin India pawisa hlutna a tlakhniam belh zel bawk a, nimin khan India pawisa Rs 72.48 leh US dollar khat a inhen a, India pawisa hlutna hniam lai ber record a siam chho mek a ni.

Kar kalta Zirtawpni khan Interbank Foreign Exchange-ah India pawisa hlutna hi dollar khatah Rs 72.18 a ni a, mahse nimin zing khan a hlutna hi tlakhniam belh lehin Rs 72.48-ah a tlak thlak belh a ni.

Hetihlai hian ramchhungah fuel man a to belh zel thung. Nimin khan Mumbai-ah chuan petrol man chu Rs 0.23-ah pun belh lehin, litre khat Rs 88-ah a kai tawh a ni. Diesel litre khat man pawh Rs 77.32 a tling tawh. Chennai-ah petrol litre khat Rs 83.91, diesel litre khat Rs 76.98 a ni a, Bengaluru-ah petrol Rrs 83.36 leh diesel Rs 75.18 a ni bawk. Kolkata-ah petrol litre khat man hi nimin khan Rs 83.61 niin, diesel litre khat Rs 75.68 a ni bawk.

Hun eng emaw chen kalta aṭang khan ramchhungah nitin deuh thawin fuel man hi a pung chho a ni. He thil avang hian Prime Minister Narendra Modi-a kaihhruai NDA sorkar chuan sawisel a tawk nasa hle a, nimin khan Congress party leh Left party-te chuan fuel man sang zel duh lohna lantirin rampumah nawrh an huaihawt a, eptu party hrang hrangten an thlawp.

Rajasthan Chief Minister Vasundhara Raje-i chuan fuel man sang zel vangin state sorkarin petrol leh diesel-a value-added tax (VAT) a lak ṭhin chu 4% in tihhniam a nih thu Pathianni khan a sawi. Hei hi Pathianni aṭang khan hman ṭan nghal a ni a, VAT tihhniam vang hian state chhungah fuel man hi litre khatah Rs 2.5-in a hniam phah a ni.

Maharashtra Chief Minister Devendra Fadnavis pawhin pawhin fuel man sang zel vanga mipuite harsatna tawh chu sutkian dan kawng an zawng mek tih a sawi a, Goods and Services Tax (GST) hnuaia petroleum dah tel chu a man tihhniam theihna a ni tiin, GST huam tel tir a nih chuan petrol man hi litre khatah Rs 5/6 in a hniam thei dawn a ni, a ti.

Bharat Bandh:
Congress party president Rahul Gandhi hoin Delhi-ah bandh hi huaihawt a ni a, Rajghat leh Zakir Husain College inkar, km 1.8-a thuiah kawng an zawh. Kawng zawh tawp hnuah eptu party hrang hrang hruaitute chu Ramila Maidan-a Indian Oil petrol pump bulah an awmkhawm zui a ni. He hunah hian UPA chairperson Sonia Gandhi leh Prime Minister hlui Manmohan Singh-te pawh an tel. Manmohan Singh leh hruaitu dangte chuan BJP kaihhruai NDA sorkarin ramchhung thil man sang zel a khuahkhirh theih loh avanga an demna thute an sawi. Congress party chuan fuel man sang zel leh India pawisa hlutna tlakhniam belh zel chuan ram economy enkawlna kawnga Modi-a kaihhruai sorkar a hlawhchham zia chiang takin a tilang a ni, a ti.

Nimina Bharat Bandh huaihawtna hmun ṭhenkhatah buaina a chhuak a, petrol pumpte suasam niin rel kawngte dan a ni.

Gujarat-ah chuan nawrh huaihawt ten motor ke halin bus-te an dang a, hei vang hian traffic lam a buai phah hle. Madhya Pradesh-ah Ujjain-ah petrol pump suasam a ni. State eng emaw zatah nawrh huaihawt vang hian rel service pawh a bahlah phah. Odisha leh Bihar-ah rel kawng dan a ni a, Bihar-ah motor ṭhenkhat suasam a ni bawk. Mumbai-ah pawh Congress worker-ten Andheri rel station-a nawrh an huaihawt vangin East Coast Railway Zone chuan rel 12 service a cancel a ngaih phah.

Nawrh huaihawt hian hmun tam takah bus service pawh a tibuai. North Eastern Karnataka Road Transport Corporation (NEKRTC) chuan nimin atan bus an service tir lo a, Telangana-ah pawh bus service a khaihhlak phah bawk a ni.

PM la ṭawngchhuak lo
Ramchhunga fuel man san belh zel leh, pawisa hlutna tlahniam zel avangin BJP kaihhruai NDA sorkar chuan beih leh sawisel a tawk nasa hle a, hetihlai hian hetiang thil thleng mek chungchangah Prime Minister Narendra Modi chu a la ṭawngchhuak lo. Congress president Rahul Gandhi chuan nimina rally neihnaah rampuma mipuite harsatna thlentu, fuel man sang zel chungchanga PM a ngawi tlat chu hriatthiam har a tih thu a sawi. Modi chuan PM anih hmain fuel man sang chungchang hi a sawichhuak fo a, mahse a PM hnuah ṭawngkam khat pawhin a sawilang duh tawh lo a ni, a ti. Hetihlai hian Petroleum minister Dharmendra Pradhan chuan fuel man san chhan chu crude oil man tihsan a nih vang nia sawiin, hei hi India sorkar leh India mite thunun theih bak a ni, a ti. Hei bakah hian OPEC chu a hmaa a tiam ang zat oil siamchhuak loah a puh bawk.