J&K-ah police leh firfiakte inkap

Jammu and Kashmir-a Srinagar-a Batmaloo bialah nimin khan police hnuaia special operations group (SOG) leh firfiakte an inkap a, police pakhat a thi a, midang pathumin hliam an tuar.

Police-te hian Batmaloo bialah firfiakte an awm thu an dawn hnuah beihpui an thlak a, firfakte hian silai lo hmetpuak hmasain an inkap zui a, nimin chawhnu lam thleng khan a la inkap a ni. Thuneitute chuan inbeihna thleng vang hian Srinagar-ah nimin khan mobile internet service an titawp nghal a ni.

Kar hmasa khan Baramulla district-a Rafiabad-ah security force-te chuan firfiak panga an kaphlum a ni. Hei hi Inspector General of Police, Kahmir SP Pani chuan August 15-a Independence Day lawmna tur inbuatsaihna chungchanga security review meeting a koh hnu lawka thleng a ni.

Kashmir-ah hian August thla chhungin firfiak te leh security force inkara inbeihna a thleng nasa hle a, Line of Control kaltlanga India rama rawn lut ru pawh an pung a ni. August thla chhung hian inbeihna thlengah mi 23 an thi tawh a, an zinga 16 chu firfiak niin sipai panga leh police pakhat bakah, civil mi pakhat an thi tawh bawk.