Meghalaya sorkarin fiahna paltlang

Meghalaya chief minister Conrad K Sangma kaihhruai Meghalaya Democratic Alliance (MDA) sorkar chu Nilaini khan Assembly-ah fiahna a paltlang. 

Eptu party, Congress chuan sorkar rin tawk lohna, no-confidence motion hi a pu lut a, darkar sarih leh a chanve vel sawiho a nih hnuah  Speaker Metbah Lyngdoh chuan voice vote lain, sorkar  hian fiahna hi a paltlang a ni. 

Vote lak hmaa sawihonaah eptu lam chuan coal mining, Covid-19 managment bakah health kaihhnawih chi hrang hranga sorkar hnathawh ṭhat tawk lohna leh an rin lohnate an sawichhuak a ni. Eptute puhna  hrang hrang hi chhangin, CM Sangma chuan a kaihhruai sorkarin state mipuite hamṭhatna tura hmasawnna hrang hrang a kalpuite a sawilang ve thung. Meghalaya chu sorkar inrelbawlna ṭhat lamah a ṭha ber dawttua thlan a nih thute a sawichhuak a ni. 

CM chuan Covid-19 leng mekah, state sorkar chuan mipuite himna turin, hri dona atan cheng vaibelchhe 399 a hmang tawh tiin, loneitute leh hnathawktu dangte tana sorkarin hamṭhatna a siamsakte a sawichhuak bawk. 

Sangma chuan state chhunga dan leh thupek dinhmun pawhin hma a sawn zel thu sawiin, hmeichhia leh naupang laka pawikhawihna thlen leh rukbo thubuai ziahluh pawh a tlahniam tawh hle a ni, a ti. Lungalhthei chungchangah pawh dan loa phurhchhuah a awm lo tih sawiin, task force-ten uluk takin an vil reng a ni, a ti.

State sorkarin Education Policy a kalpui thu leh, kumtin state chhunga lower primary school 200-te chu  tihchangtlun zel an nih tur thu CM chuan a sawi. Education sector atan bik Rs vbc 800 hman a nih tur thu te, hripui leng vanga state dang hawte pawh sum lama ṭanpuina pek an nih thute a sawi bawk. 

Chief Minister chuan a kaihruai sorkarin field hrang hrang, sports leh musics te pawh huamin skill development kalpuina atan e-coupon hman a tum thu sawiin, hei hi India rama a ti hmasa ber tur an nih thu a sawi a ni.