Taloja jail aṭangin Goswami chhuak

Republic TV editor-in-chief Arnab Goswami chu Nilaini kha Supreme Court-in interim bail a dilna a phalsak tak avangin hemi zan vek hian a tanna, Mumbai-a Taloja jail aṭangin chhuah a ni.  

Kum 2018-a interior desginer Anvay Naik leh a nu te intihhlum chhanah Arnab Goswami leh midang pahnih, Nitesh Sard (Smartworks) leh Feroz Shaik (IcastX/ Skimedia) te chu inhnamhnawihna neia puhin Mumbai police-ten an man a, Taloja jail-ah tantir a ni. 

Bombay High Court chuan Goswani bail dilna hi a hnawlsak a, hemi hnu hian Supreme Court-ah a thlen leh a ni. Nilaini khan SC chuan a bail dilna hi ngaihtuahin, Goswami leh midang pahnihte chu Rs 50,000 ṭheuh dahkham a, bail-a chhuah a phalsak a, hemi rual hian an thubuai chhuinaah investigator-te chu ṭha taka thawhpui turin a ti bawk. 

Goswami bail dilna ngaihtuahtu, justice DY Chandrachud leh Indira Banerjee awmna bench chuan Bombay High Court-in bail a phalsak lo chu a dik lo a ni, a ti. 

Justice Chandrachud chuan, "Goswami ideology hi in duhzawng a ni kher lo ang. Kei pawhin a channel hi ka ne ngai  bik lo a, mahse hei hi ama mimal chungchang bik a ni lo. Personal liberty chungchang a ni," tiin bail a dilna an pawmsak chhan a sawifiah. Hetianga state-in mimal bik a bitum chuan Supreme Court chu inrawlh a ngai a ni, a ti.