OTT platform-te I&B ministry hnuaiah awm tawh dawn

Sorkar laipui chuan Over The Top (OTT) platform-te chu Information and Broadcasting ministry hnuai­ah a awm dawn thu a tarlang a, he thuchhuak hi president Ram Nath Kovind chuan a pawmpui tawh a ni. 

OTT palform-te hi online news portal, streaming service kan tih heng Netflix, Amazon Prime Video, Hotstar leh a dangte an ni a, hengte hi internet leh operator network kaltlanga mipuite hman theiha pekchhuah ṭhin a ni. Heng bakah hian social media platform- Facebook, Twitter leh Instagram leh a dangte pawh a tel.

I&B ministry hnuaia an awm tawh dawn avangin online platform content - film, audio-visual, news leh current affairs kaihhawihte chu ministry-in a remtih chin an chhuah/tilang thei tawh dawn a ni.

Print media (chanchinbu leh a kaihhawih) chu Press Council of India hnuaiah a awm dawn a, News Broad­casters Association (NBA) chuan news channel-te  enkawlin, advertisment lam khuahkhirhtu tur atan Advertising Standards Council of India chu ruat a ni. Central Board of Film Certification (CBFC) chuan film zawng zawng a khuahkhirh thung ang.

Thla hlui khan Supreme Court (SC) chuan sorkar laipui hnena aṭanga a dawn, Over The Top (OTT) platform-te thunun/khuahkhirh a nih theihna tur chungchang chu a ngaihtuah a, SC chuan sorkar laipui hnenah heng paltform-te hi autonomous body pakhat hnuaia awm thei tur an nih thu sorkar laipui chu a hriattir leh a ni.

I&B ministry hnuaiah a awm tawh dawn avangin heng platform hrang hrangte hian an pekchhuah (stream) tur chu ministry aṭangin pawmpuina an lak a ngai tawh dawn a ni.