Vanglaini logo

Economy a ṭha chho leh mek : FM Sitharaman

Union finance miniser Nirmala Sitharaman chuan nimin khan Delhi-a National Media Centre-ah press conference a nei a, India economy chu a ṭha chho leh mek tih a sawi. 

Hripui leng vanga economy tlakhniamna te siamṭha tura sorkarin hma a lak dante sawiin, tunah chuan economy hian ṭhat lam a pan chho leh ṭan a ni, tiin minister chuan a sawi a, hmalakna tur tharte a puang nghal bawk. India ramah Covid-19 kai mek zat pawh an tlahniam zel tih sawiin, hripui thihpui zat, fatality rate pawh 1.47% a nih thu a sawi bawk. 

Minister chuan NABARD kaltlangin loneitute hnenah Additional Emergency Working Capital Funding aṭangin cheng vaibelchhe 25,000 sem a nih thu a sawi a, hei bakah hian Kisan Credit Cards kaltlangin loneitu vaibelchhe 2.5 te hnenah cheng vaibelchhe nuai 1.4 sem a ni tawh tih a sawi bawk a ni. 

Finance minister thusawi ṭhenkhatte :

  1. Covid-19 recovery phase, October 1,2020 - June, 2021  chhung atan Atmanirbhar 3.0, Atmanirbhar Bharat Rozgar Yojana  siam a ni.
  2. He scheme hnuaiah kum hnih chhung chu sorkarin EPF-a employee leh employer-ten an hlawh aṭanga 12% an dah ṭhin chu sorkarin a tumsak dawn, hei hi sum lam indaihlohna avanga company-ten hna thar siam belhna kawnga harsatna an tawh sutkianna atana tih a ni. Hei hi establishment, hnathawktu 1,000 chin awm tana tih a ni. 
  3. Establishment, hnathawktu 50 aia tlem neite chuan thawktu pahnih tal an la thar tur a ni a; hnathawk 50 aia tam awmnaah chuan mi panga tal lak thar tur a ni bawk. He scheme base atan hian September thla hman a ni ang. 
  4. Emergency credine line guarantee scheme chu March 31, 2021 thleng pawhsei a ni. 
  5. He scheme hi MSMEs, business enterprises, individual loans for business purposes, MUDRA borrower ten an hmang thei ang. 
  6. Scheme hnuaiah hian pawisa puk tur mi nuai 61 te tan cheng vaibelchhe nuai 2.05 sanction a ni a, nimin thleng khan Rs nuai 1.52 pek chhuah a ni tawh.