Tamil Nadu-in ruahsur nasa avangin harsatna tawk ; Chennai leh hmun dangah school khar a ni

Ruahsur nasa avangin Tamil Nadu state leh a chhehvel bialte chuan harsatna an tawk mek. Chennai leh district ṭhenkhatah chuan ni hnih chhung atan school khar a ni.

State chhung hmun tam takah ruahsur nasa avanga tui chim chim sang zel vangin harsatna lian tak an hmachhawn mek, mi tam tak chu dinhmun derthawng takah an ding mek.

Chief minister MK Stalin chuan Chennai bakah district dang pathum - Changalpattu, Kancheepuram leh Thiruvalluvar-ah ni hnih chhung atan school khar a nih thu nimin khan a puang. CM chuan private firm-te pawh ruahsur nasat chhung chu holiday puang tur emaw, an hnathawkte chu in lam aṭanga thawh phalsak emaw turin a ngen bawk.

Puducherry-ah pawh nimin leh vawiinah school khar a ni bawk ang. Puducherry-ah hian nimin aṭang khan Class 1-8 hawn ṭan tura tih a ni a, mahse ruahsur nasa tak avang leh, a la sur chhunzawm zel dawn nia sawi anih avangin school hawn hi tikhawtlai a ni ta a ni.

Tamil Nadu-a ruahsur hian zual lam a la pan zel dawn nia sawi a ni. India Meteorological Department, IMD chuan November 9-11 inkarah Andhra Pradesh leh Tamil Nadu tuipui kam velah ruah nasa zawkin a la sur leh dawn tih a sawi. Tamil Nadu hian ruahtui an dawn ṭhin aiin 43% in a dawng tam zawk a, hei hian hmun tam takah tui lian a thlen phah a ni. Pathianni bik khan darkar 12 chhungin ruahtui 20 cm a tla hman niin health minister Ma Subramanian chuan a sawi.

Tiruvannamalai-a school leh college zawng zawngte chu khar an ni a, Chennai leh area danga zin tum mipuite chu ṭhulh rih tura ngen an ni bawk.

IMD-in ruah a la sur chhunzawm zel dawn tia a sawi avangin, zirlaite bakah mipuite pawh mahni in lama tawm rih tur leh zirna hmuna an let leh hmain educational institution te thu ngaichang turin an chah a ni.

Prime minister Narendra Modi chuan Pathianni khan Tamil Nadu chief minister M K Stalin biain, ruahsur avanga harsatna an tawh mekah sorkar laipui aṭangin ṭanpuina ṭul leh mamawh angte chu pek zel a tiam.

Modi chuan "Tamil Nadu CM MK Stalin nen kan inbia a, state chhunga ruahsur nasa tak chungchang leh an dinhmunte kan sawidun a ni. Centre aṭanga ṭanpuina leh chhawmdawlna an hmuh theih nan theihtawp kan chhuahpui ang. Mitinte hriselna leh him nan ka ṭawngtai pui a ni," tiin a twitter kaltlangin a sawi.