Telangana CM-in state BJP hruaitute vau

Telangana chief minister K Chandrasekhar Rao chuan Pathianni khan state BJP chief Bandi Sanjay chu loneitute tihder a, an buh thar chhuahte an leisak dawn nia sawi avangin na taka sawiselin, a vau zui bawk.

KCR chuan sorkar laipuiin buh hi an leisak dawn lo tih chiang takin a lo sawi tawh a, agriculture minister pawhin buh ni loin, thlai dang chin tur pawhin a lo ti tawh a ni, a ti. "Keimah ngeiin Union Minister hi hmuin, buh hi leisak tur pawhin ka ngen a ni. Mahse a lo ngaihtuah tur thu leh, min biakpawh tur thu min lo hrilh a, tun thlengin engmah chhanna kan la hmu lo. Telangana state hian nikum ami pawh buh thar pawh ton nuai 5 vel kan nei a, sorkar laipuiin a leisak lo a ni," a ti.

"Sorkar laipuiin a leisak loh tur thu a sawi laiin, state BJP hruaitu chuan a leisak dawn tiin a lo sawi thung a, hetianga tawng thlahdah mai mai lo tur hian kan duh. Kan chungchang ṭul lo taka lo sawi ve in tum chuan state BJP hruaitute lei chu kan tansak mai ang," tiin CM chuan a vau a, Sanjay chuan jail-a khungah a vau thu sawi bawkin, "A ngam a nih chuan min rawn khawih rawh se," tiin a chhang let a ni.

Telangana CM chuan farm law duh loa loneitu nawrh huaihawt mekte chu a thlawp thu a sawi bawk. "BJP chuan loneitute chu motor-a suin an chil hlum a, BJP CM chuan loneitute vaw hlum turin mipuite a fuih bawk a ni," a ti. Farm law dodaltute chu an thlawp zel tur thu sawiin, heng loneitute himna leh chhanchhuak tur hian mawhphurhna an neih thu a sawi bawk.