Oppenheimer-ah chang tur an ṭha zual zel ; Robert Downey Jr. leh Matt Damon-te an tel leh ta

Christopher Nolan-a film thar tur 'Oppenheimer'-a changtu tur zingah Robert Downey Jr. leh Matt Damon-te pawh an tel ve leh ta.

Variety chuan hemi chungchang hi tarlangin kum 56-a upa 'Avengers' star leh kum 51-a upa Oscar hial dawng tawh Damon-te hi Nolan-a film thar turah hian an inlan dawn niin an sawi.

He film-ah hian heng actor lar pahnih hian tu lem nge an chan dawn erawh puanzar a la ni loa, film ropui tak tak siam tawhtu Nolan hian a film-a chang tur hi a thlang uluk hle tih pawh a hriat.

Cillian Murphy chu physicist J. Robert Oppenheimer lemah a chang dawn tih puanzar a ni tawh a, a nupui Katherine Oppenheimer Vissering lemah Emily Blunt a chang dawn tih puanzar ni tawhin tunah hian Downey Jr. leh Damon-te hian an zawm ve leh ta a ni.

July 21, 2023-a tlangzarh hman an tum 'the father of the atomic bomb' tia hriar lar Oppenheimer chanchin film-a siam tur hi Nolan hian a direct dawn bakah script pawh a buaipui dawn bawk.