Nirbhaya pawngsualtu mi pali Jan 22-ah khaihlum dawn

Kum 2012-a Nirbhaya pawngsualtu mi palite chu January 22 zing dar 7-ah Delhi Tihar Jail-ah khaihlum an ni dawn tih Delhi court chuan Thawhlehni khan a tarlang.

Heng mi pali khaihlum tura tihte hi- Pawan Gupta, Mukesh Singh, Vinay Sharma leh Akshay Thakur-te an ni. Hetihlai hian khaihlum turte hian President hnenah 'mercy petition' khaihlum an nih hmain an la thlen thei thung.

Kum 2012 December 12 khan medical zirlai kum 23 mi 'Nirbhaya' tia a hming lem an vuah, a hming tak erawh Jyoti Singh chu rawng takin South Delhi-a bus chhungah mi parukin an pawngsual rawn a, an pawngsual hnuah motor aṭangin an paihchhuak a ni. Singapore hospital-ah enkawl zui tura hruai a nih hnu, December 29 khan a hliam tuar loin a thi a ni. He pawikhawihna rapthlak tak hian rampum a nghawrnghing a, khatih hunlai khan hmun tam takah duh lohna lantir a ni nghe nghe. 

Pawngsualtu zinga pakhat chu 2013 March thla khan jail-ah a intihlum. Kum tling lo pakhat a tel bawk a, ani hi kum thum chhung jail a tan hnuah, kum 2015 December 20 khan chhuah zalen a ni thung. Nirbhaya pawngsual thubuai vang leh pawngsualna rapthlak tak tak ramchhung hmun hrang hrangah a thlen avangin pawngsualtu leh mipat hmeichhiat lam hawia pawikhawihte hremna na zawk pekna turin dan pawh sorkarin a siam phah a ni.