Jawaharlal Nehru University buaina MP 100 rualin JNU VC bang turin ngen dawn

CPI (M) hruaitu Sitaram Yechury chuan Delhi-a Jawa­harlal Nehru University (JNU) campus chhunga misualte'n pawikhawihna an thlen hnuah, MP 100 rualte'n president Ram Nath Kovind hnenah JNU Vice Chancellor (VC) M Jagadesh Kumar chu ban tura ngenna an thlen tur thu a sawi. 

JNU teachers' association leh students' union-te'n Thawhlehnia public meeting an buatsaihah Yechury chuan he thu hi a sawi a ni. Yechury chuan JNU visitory, President hnenah VC ban tura ngenna hi an ziak dawn tih sawiin, Parliament member an biak pawh zinga 100 vel zet chuan an remtih thu pawh an sawi tawh a ni, a ti. A thusawi hi zirlai leh zirtute'n kutbengin an lo lawm a ni. 

Pathianni zana misualte'n university campus luhchilh a, zirlai leh zirtirtute kut an thlak chungchangah VC hi hma la ṭha tawk lohah puhin zirlai pawl chuan an sawisel nasa hle a, bang tur pawhin an lo phut tawh bawk.

Bang tura nasa taka an phut mek Jawaharlal Nehru Univer­sity, Vice-Chancellor Jagadesh Ku­mar chuan nimin khan Human Resource, Secretary (Higher Edu­cation), Amit Khare chu New Delhi-ah hmuin inbiakna a neihpui.

Jagadesh Kumar hian uni­versity-a boruak ralmuang a awm theihna tura hmalak pui turin HDR secretary hi a ngen a, hemi chungchangah hian theihtawpa hma an lak mek thu a sawi bawk.

‘Free Kashmir’ thuziak kengtu lakah FIR thehlut 

JNU-a thilthleng duh loh vanga 'Gateway of India'-a nawrh huaihawtnaah hmeichhe pakhat chuan ‘Free Kashmir’ tih thuziak a lo keng a, hemi vang hian a lakah FIR thehluh a ni.

He thuziak kengtu hi Mehak Prabhu a ni tih tarlan a ni tawh bawk. "Mi tam takin NRC, CAA leh JNU thilthleng duh lohna lan tirin placard an keng ka hmu a, keipawhin Kashmir chungchang placard ka keng ve mai a ni. Hei hi India constitution bulṭhuta Kashmir chungchang ziah lanna a awm vang a ni." tiin Prabhu chuan a thuziak ken chungchang a sawi

Pathianni khan Mumbai-a Gateway of India-ah JNU thil­thleng duh lohna lantir a ni a, he hunah hian mipui tam tak an punkhawm bakah, pungkawm te hian placard kengin, 'Stand with JNU', 'Ban on ABVP' tihte leh thu ziak hrang hrang an keng a ni. 

Delhi-a JNU campus chhung­ah hian Pathianni zan khan misual hmaituamte eng emaw zat chu lutin zirlai leh zirtirtute an bei a, mi 34 vel an hliam. Pawikhawihtute hi tute nge an ni tih hriat chian la ni lo mah se, JNU students' union chuan RSS zirlai pawl, Akhil Bharatiya Vidyarthi Parishad (ABVP) anni tih an sawi a ni.