Mumbai-a Covid vaccine lem pe chhuaktu mi 8 man

Mumbai police-te chuan Covid vaccine lem pechhuaktu mi pariatte chu nimin khan an man a, thubuai siamsak nghal an ni.

Police-te chuan an mi mante Mumbai khawpuia vaccination camp an siamah mi 2,000 vel chuan vaccine hi an lo la hman niin an sawi. An vaccine vial-ah hian Covishield tih a inziak niin vaccine latu ṭhenkhat chuan an sawi a, mahse burah hian eng damdawi tak nge an dah hriatchian a ni lo a, Gujarat aṭanga an lakluh niin an sawi.

Bombay High Court chuan Brihanmumbai Municipal Corporation (BMC) hnenah vial-a awm chu eng chiah nge a ni tih chhui chhuak thuai tur leh, he camp lem siama vaccine late hriselna dinhmun pawh enfiah a, Covid antibodies test neihsak a, vaccine dik tak pe turin a hrilh a ni.

Joint Commissioner of Police (Law and Order) Vishwas Nangre Patil chuan mi pariat an mante kut aṭang hian mi an bumna aṭanga an sum hmuh, cheng nuai 12.40 an man tel tih an sawi. Mawhphurtu ber nia puh, Manish Tripathi leh Mahendra Singh-te bank account pawh khawih chet theih lohin hreksak nghal a ni bawk.