A hun takah J&K chu state a ni leh ang : PM Modi

Prime minister Narendra Modi chuan Ningania Jammu and Kashmir political leader-te nena meeting an neihah, Jammu and Kashmir chu a hun takah state-ah dah leh a ni ang, a ti.

PM Modi hoa all-party meeting neihah hian J&K-a political party pariat aṭangin hruaitu 14 an tel a, an zingah hian chief minister hlui pali pawh an tel a ni.

Meeting hi darkar thum vel neiin, kum 2019-a central-a BJP kaihhruai NDA sorkarin J&K special status pekna, Constitution-a Article 370 a tihtawp leh, J&K state ṭhiat a, union territory pahnih - Jammu and Kashmir leh Ladakh-a a ṭhen chungchangte leh, hemi hnua tualchhung dinhmunte an sawiho.

Modi chuan J&K hnenah statehood chu a hun takah pek leh a ni dawn tih sawiin, hemi rual hian inthlan neih anih theihna atan assembly constituency huam chin siamṭhat, delimination a ṭul thu a sawi. Delimination zawh hnuah inthlan hi buatsaih thuai a ni thei dawn a ni, a ti.

Ningania PM hoa meeting neih hi kum 2019-a Article 370 ṭhiah a nih hnua sorkar laipuiin J&K political leader-te an dinhmun sawipuia a biakpawh ṭum khatna a ni. Article 370 ṭhiah a nih rual hian J&K-a political party hruaitu eng emaw zat man niin, an zinga ṭhenkhat chu chhuah an ni tawh. Meeting-ah hian J&K lieutenant governor Manoj Sinhna chu politics vanga tang mek leh chhuah tawhte thubuai ennawntu tur committee din tura tih a ni.