India ram mipui 50% in mask an vuah lo : Health Ministry

Union health minis­try chuan Ningania India rama Covid-19 din­hmun thlirletna an neih chungchang a tihchhuahah, ram chhunga mipui cheng zatve, 50% chuan mask an vuah lo tih a sawi.

Health ministry chuan mask chungchanga zirchianna hi khawpui 25-ah neih a ni tih a sawi. He zirchianna aṭang hian mipui zinga 50% chuan mask an vuah lo a, mask vuah zingah a pawh a nih dan tur ang taka vuah chu 14% chauh an nih thu a tarlang.

Mask vuah zingah 65% chuan an hmui tuam mah se an hnar an tuam tel lo a, 20% chuan an khabe-ah an hreng a, 2% chuan nghawngah an awrh ringawt a ni, a ti. Mask vuah dan tur dik- hnar, hmui leh khabe tuam a, hnar ngula clip hmanga tichip ṭha chu 14% chauh an awm a ni, tiin a sawi.

Health ministry joint secretary Lav Agarwal chuan state pariat-ah hri kai mek, active case 50,000 aṭanga nuai khat an awm a, state 19 chuan active case 50,000 aia tlem an nei thung, a ti. Positivity rate 25% aia a tamna state hi pasarih awmin, state pakuaah 20-25% a ni a, state 22-ah chuan 15% chunglam a ni bawk. Hetih lai hian state 13-ah positivity rate hi 5-15% inkar niin, 5% aia tlem awmna chu state pakhat chauh a ni, a ti.

Tamil Nadu, Megha­laya, Tripura, Mani­pur, Nagaland, Sikkim, Mizoram te chuan kar thum liamta chhung khan hri kai hmuhchhuah leh positivity rate a san thu health ministry official chuan a sawi bawk.