Hri kai thar nuai 2.59 awm belh leh : Ni khata sample test tam ni ber thleng

India ramah Ningani khan Covid-19 hri kai thar nuai 2.59 awm belh lehin hri kai hmuhchhuah tawh zawng zawng chu vaibelchhe 2.6 an tling tawh. Hemi ni vek hian hri vangin 4,209 an thi a, ram puma hripui thihpui tawh zawng zawng chu 2,91,331 an ni.

Ningani khan ram pumah Covid-19 sample nuai 20.61 endik niin, ni khata sample endik tam ber ṭum a ni.

Hri leng thawh hnihna thleng mek karah ram chhungah vaccine pek chhuah hna ngawrh taka kalpui mek a ni. Vaccine sem chhuah ṭhat hian hri leng thawh thumna, thla 6 aṭanga thla 8 inkara lo thleng leh tura rin chu a tihnep phah beisei a ni.

Ni li liamta chhung ram chhung hri kai thar nuai thum hnuai lamah tla thlain, positivity rate pawh 12.58% ah a tla thla tawh bawk.

Maharashtra, Karnataka, Kerala, Tamil Nadu leh Uttar Pradesh te chu hri kai tam zualna state te an la ni chhunzawm zel.

Maharashtra-ah Ningani khan coronavirus hri kai thar 29,911 hmuhchhuah niin, mi 984 in an thihpui. Hri kai hmuhchhuah tawh 54,97,488 awmin, hri vanga thi 85,355 an awm tawh a ni. Maharashtra khawpui, Mumbai ah positive rate 4.84% ah a tlahniam a, thla hnih hnua a tlakhniam ber ṭum niin, khawpui huam chhung bikah Ningani khan hri kai thar 1,425 an awm.

Karnataka-ah chuan hri kai thar 28,869 an neih belh leh a, mi 548 in an thihpui thung. Bengaluru-a hri kai hmuhchhuah pawh 9,409 niin, hri kai thar hi an tlahniam a ni.

Tamil Nadu-ah hri kai 35,579 awmbelh lehin Nilaini aiin positivity rate 2% in a sang thung. State khawpui, Chennai-ah pawh hri kai thar hi tlahniam ve lehin, mi 6,073 hmuhchhuah an ni.

Delhi-ah Ningani vek khan hri kai thar 3,231 an awm leh a, 233 in nunna an chan. Delhi khawpui-ah hian ni hnih liam ta chhung chu hri kai hmuhchhuah 4,000 aiin an tlem tawh a, positivity rate pawh 5.5% ah a tlahniam. Chief minister Arvind Kejriwal chuan Lieutenant Governor Anil Baijal nena an inkawm hnuin, kartawpa lockdown hlih an tum thu a sawi.

State tam tak chuan Covid hri kai dam tawh zingah natna hlauhawm tak Black Fungus infection pung mek thunun tumin ruahmanna an siam. Odisha leh Gujarat chuan Mucormycosis chu epidemic-ah an puang tawh a, Delhi sorkar chuan Black Fungus treatment centre siamna turin damdawi-in pathum an buatsaih lawk tur thu a sawi.

India rama vaccine semchhuah kalpui mek chu a zawnin ni sarih chhung a tlahniam tawh a, Ningani khan mi nuai 11.66 hnenah chiah an pek theih avangin hri leng a hluar thar leh hlauhthawnna a lian hle.