Union Home Secy hoin Delhi dinhmun sawiho

Delhi khawpuia  Covid-19 hri lengin zual lam a pan zel vangin union home secretary  Ajay Bhalla hoin Thawhṭanni khan high level meeting neih a ni. 

India ram khawpui New Delhi-ah hian ni nga liam ta chhungin Covid-19 hri kai thar mi 5,000 chuang an awm ziah a, hei vang hian Delhi chief minister Arvind Kejriwal kaihhruai sorkar chuan Delhi-ah hian Covid-19 hri leng thawh thumna a thleng leh mek a ni a, ti.

High level meeting neihah hian Delhi-a Covid-19 hri leng thawh chak dan te sawiho a ni a,hri lengin zual lam a pan chhan hi economy hawn a nih leh avang te, festival lo thleng tur vanga bazara thil leia chhuak an tam vang te, khawvawh chho mek vangte leh boruak chhia, air pollution level a san chhoh mek vang nia ngaih a ni. Meeting-ah hian engtia hmalak zel tur nge tih te chu an ngaihtuah ho a ni bawk.

Public policy and health systems expert, Dr Chandrakant Lahariya chuan, "Kawngpuia vei vak an tam hle a, mi ṭhenkhat chuan an ṭhian hlui te an hmu a, heng mipui punkhawm tam vang hian hri inkaidarhna hi a punlun phah a ni," tiin a sawi. Dr Lahariya hi "Till We Win: India’s fight against Covid- 19 pandemic" tih lehkhabu thar tur ziaktute zinga mi a ni.