Farm Law kalh tur Bill Rajasthan Assembly-in A pawm

Rajasthan Assembly chuan Congress kaihhruai Punjab leh Chhattisgarh state sorkarte hnungzuiin Thawhṭanni khan BJP kaihhruai sorkar laipui Farm Law siam thar kalh tur bill pathum an pawm.

House-a bill pawm a nih hma hian darkar riat lai debate neih a ni a, voice vote lak niin vote lak dawnah hian BJP MLA-te chu house aṭangin an chhuak tau a ni. 

Rajasthan bill tharah hian thlai thar chhuahte chu minimum support price (MSP) aia toin zawrh chhuah leh lei a ngai dawn a, loneitu chunga pawikhawihna thlentu chu kum thum aṭanga kum sarih thlen tan tir theih a ni dawn bawk. Mahse he bill hi Governor-in a pawmpui phawt a la ngai dawn thung.

Farm law hi tunhnai lawk khan Parliament-ah pawm niin ramchhung hmun hrang hranga loneitu pawl leh eptu party-te chuan an dodal nasa hle a, BJP kaihhruai sorkar chuan MSP system ṭhiah an tum ni tein an sawi hial.

Rajasthan Assembly-a debate neihnaah hian Rajasthan Parliamentary Affairs Minister Shanti Dhariwal chuan sorkar laipui Farm law thar chu ram pumin a duh lo tih sawiin Land Acquisition Act ang chiahin sut leh vek an la ngai dawn tih a sawi.

Dhariwal chuan loneitute chuan tuna system hman mekah pawh hian sorkarin a sawi ang lo takin ram chhung khawiah pawh an thlai tharte chu an zuar thei reng tih a sawi bawk a ni.