Delhi-ah ni 5 chhung A zawnin hri kai thar mi 5,000 chuang awm ziah

India ram khawpui New Delhi-ah ni nga liam ta chhungin Covid-19 hri kai thar mi 5000 chuang an awm ziah a, positivity rate hi 13% dawn a ni tawh. 

Kar liam ta Nilaini khan Delhi-a Covid-19 hri kai thar hi mi 5,673 an awm a, Ningani khan 5,739, Zirtawpni khan 5,891 an awm leh a, Inrinni khan 5,062 an awm a, Pathianni khan mi 5,664 an awm bawk. Ni nga chhung chu a zawnin hri kai thar hi mi 5,000 chuang an awm ziah a ni.

Delhi-a hri kai tawh zawng zawng hi mi  3,92,370 an tling tawh a, heng zinga mi 3,51,635 chu enkawl dam tawh an ni. Kar liam ta Nilaini khan he hri vanga thi hi mi 40 an awm a, Ninganiah 27, Zirtawpniah 47, Inrinniah 41, Pathianniah 54 thi an awm.Covid-19 vangin Delhi-ah hian mi 6,562 an thi tawh. 

Hri kai la enkawl mek (active case) hi mi 34,173 an awm a, heng zinga mi 20,732 chu inlama enkawl (home isolation) an ni. March 2 khan Delhi-ah hian Covid-19 hri kai hmasa ber chu hriat chhuah a ni. 

Delhi-ah hian mi 47,25,318 chu test neihpui tawh a ni.