Rahul Gandhi-an bial pahnihah chuh dawn

Congress Party president Rahul Gandhi chu Lok Sabha inthlanah a bial ngai, Uttar Pradesh-a Amethi bial bakah Kerala-a Wayanad bial-ah a chuh dawn. 

Congress senior leader AK Antony chuan, "Chhim lam state-te chuan Congress president hi an state-a ding turin an ngen vek a, uluk taka a ngaihtuah hnuah Kerala-a Wayanad  biala din hi a titlu ta a ni", a ti. Wayanad hi rural district niin state dang pahnih, Karnataka leh Tamil Nadu nena inri a ni. He bial hi hun rei tak chhung Congress party chakna bial niin, Rahul Gandhi tan pawh a harsa lo hle tura ngaih a ni. 

Congress Working Commi-ttee chuan kar hmasa khan chhim lam seat-a partry president din tel tir hi a rel a ni. Hei hian Lok Sabha inthlan neih turah chhim lam state-a Congress party dinhmun a chawikan theih an beisei a ni. BJP chuan Congress thutlukna siam hi an bei zui nghal a, Amethi biala BJP candidate, Union minister Smiti Irani chuan Rahul Gandhi chu tlanchhia a, a constituency in a hnawtchhuak ta niin a sawi.

Mahse Congress chuan BJP lam thu sawi duh dan chu a puitlin loh thlak hle tih sawiin a chhang let nghal a, "Hetiang bawk hian Narendra Modi-an Gujarat a chhuahsan chhan khan a puh ve theih reng dawn a ni. BJP minister Smriti Irani hi Amethi leh Chandi Chowk (Delhi) bialah a chak zo lo ve ve tawh a, tunah Amethi bialah pawh chak lo leh tur bawkin a inbuatsaih a ni", tiin Congress party thupuangtu  Randeep Singh Surjewala chuan a sawi. 

Prime Minister Narendra Modi-a kaihhruai NDA sorkar chu India hmar leh chhim ṭhendarh tuma boruak ṭha lo tak siam tumah puihn, Surjewala chuan hei vang hian chhim lam state pathum, Karnataka, Kerala leh Tamil Nadu-te chuan Rahul Gandhi hi an state-a ding turin an ngen nasa hle tih a sawi.