Vawiinah Lok Sabha inthlan result puang dawn

April 11 leh May 19 inkar chhunga 17th Lok Sabha inthlan result chu vawiin hian puan a ni dawn a, centre-a sorkar thar siamtu tur hriat theih a ni dawn ta.  

Lok Sabha inthlanpui hi thawh sarihah neih a ni a, April 11- May 19 chhungin Lok Sabha member 542 tur thlangin mipuiten vote an thlak a ni. Inthlan pumpuia vote tla hi 67% a ni a, hei hi Lok Sabha inthlan neih tawha vote tlak ṭhat ber ṭum a ni. Candidate 8,000 chuang an awm. Lok Sabha inthlan neih rual hian Andhra Pradesh, Arunachal Pradesh, Odisha leh Sikkim-ahte legislative assembly inthlan neih a ni nghal bawk. 

16th Lok Sabha kal mekah hian Bharatiya Janata Party (BJP) kaihhruai National Democratic Alliance (NDA) chuan seat 336 an nei mek. BJP hian party mala sorkarna siam thei tur khawp member 282 zet a nei pha a, mahse NDA hnuaia a thawhpui party dangte nen ṭangrual sorkar an siam zawk a ni. Congress kaihhruai United Progressive Alliance (UPA) chuan seat 59 an nei bawk. Kum 2014 Lok Sabha inthlan hi inthlanpui neih tawha Congress party a chet chhiat ber ṭum a ni a, seat 44 chiah a nei phak a ni. 

Zing dar 8 aṭangin vote chhiar dawn
Ram pumah zing dar 8 aṭangin vote chhiar ṭan a ni dawn a, EVM bakah constituency tinah voter verified paper audit trail (VVPAT) panga zel chhiar tel a nih dawn avangin vote chhiar hun chhung hi a rei phah dawn a, result kimchang puanchhuah hun pawh a tlai phah dawn a ni. Postal ballot-te chhiar hmasak an ni dawn a, service voter hi nuai 18 zet an awm bawk.

Heng zingah hian armed forces, central police force leh state police mi leh sa, an bial pawna duty-a chhuakte an tel a ni. Rampawn lama Indian embassy-a diplomat leh staff-te pawh service voter-a chhiar tel an ni bawk. Postal ballot chhiar zawhah EVM-a vote tlate chhiar a ni leh ang a, a tawpah VVPAT slip-te chhiar an ni ang. VVPAT slip chhiar tel a ngaih dawn avangin darkar li aṭanga darkar nga vel hun hman belh a ngai dawn a ni. EVM leh VVPAT slip hi a inmil lo a awm a nih chuan, paper slip-a lang zawk chu pawm a ni ang. 

17th Lok Sabha inthlan hi bial 545 zinga 543-ah neih tura tih a ni a, mahse Tamil Nadu-a Vellore constituency-ah vote leina atana hman tum nia hriat, sum tam tham tak man a nih avangin Election Commission chuan he biala inthlan neih tur hi a ṭhulh tir a, bial 542-ah inthlan hi neih a ni ta a ni. Vellore-a inthlan neih hun tur hi puan a la ni lo.